పుష్ప గుర్తొస్తోంది నానీ..

నేచురల్ స్టార్ నాని సరికొత్త అవతారంలోకి మారిపోయాడు ‘దసరా’ సినిమా కోసం. ఈ చిత్రం ప్రి లుక్ పోస్టర్ రిలీజ్ చేసినపుడే ఇదొక రా అండ్ రస్టిక్ ఫీల్ ఉన్న సినిమా అని అర్థమైపోయింది. తెలంగాణ నేపథ్యంలో సాగే ఈ సినిమాలో నాని ఊర మాస్‌గా కనిపించబోతున్నాడన్న సంకేతాలు వచ్చాయి. ఇప్పుడు ‘దసరా’ ఫస్ట్ లుక్ చూశాక ఆ అభిప్రాయం మరింత బలపడింది.

ఐతే ఈ ఫస్ట్ లుక్ చూసిన వాళ్లందరికీ కళ్ల ముందు ఒకసారి ‘పుష్ప’ సినిమా కదలాడి ఉంటే ఆశ్చర్యమేమీ లేదు. లుక్ పరంగా నాని కొత్త మేకోవర్ కోసం చాలా కష్టపడ్డప్పటికీ.. చివరికి పుష్పరాజ్‌ను తలపించే లుక్‌లోకే వచ్చాడు. తన జుట్టు, గడ్డం, లుంగీ.. ఇలా మొత్తం గెటప్ ‘పుష్ప’లో అల్లు అర్జున్ లుక్‌కు చాలా దగ్గరగా ఉంది. ఒక హీరో ఒక కొత్త లుక్ ట్రై చేశాక దానికి దగ్గరగా ఏ లుక్ ఉన్నా కాపీ అన్నట్లే చూస్తారు. కొత్తగా ఫీలవ్వరు.

నానిని ఇంత మాస్ అవతారంలో చూడటం కొత్తగా అనిపించినప్పటికీ.. ‘పుష్ప’ ప్రభావం మాత్రం ఈ పోస్టర్లో స్పష్టంగా కనిపిస్తోంది. పైగా ఈ చిత్రాన్ని రూపొందిస్తున్న శ్రీకాంత్ ఓదెల.. సుకుమార్ శిష్యుడు కావడం.. ‘రంగస్థలం’, ‘పుష్ప’ చిత్రాలకు అతను పని చేయడంతో గురువు ఇంపాక్ట్ శిష్యుడి మీద చాలా ఉందనే  అభిప్రాయం బలపడుతోంది. ఐతే ‘పుష్ప’ రాయలసీమ నేపథ్యంలో నడిచే కథ కాగా.. ‘దసరా’ తెలంగాణ నేపథ్యంలో నడుస్తుంది.

ఈ రకంగా భాష, యాస, వాతావరణం పరంగా వైవిధ్యం తీసుకురావడానికి ఛాన్సుంది. కథ పరంగా కూడా శ్రీకాంత్ ఏమేర కొత్తగా ప్రయత్నిస్తాడో చూడాలి. ఈ చిత్రంలో కీర్తి సురేష్ కథానాయికగా నటిస్తున్న సంగతి తెలిసిందే. పడిపడి లేచె మనసు, విరాటపర్వం, ఆడవాళ్ళు మీకు జోహార్లు చిత్రాల నిర్మాత సుధాకర్ చెరుకూరి ‘దసరా’ను నిర్మిస్తున్నాడు. తమిళ సంగీత దర్శకుడు సంతోష్ నారాయణన్ ఈ చిత్రానికి మ్యూజిక్ అందిస్తున్నాడు.