అర్జున్ రెడ్డి.. జెర్సీ.. త‌ర్వాత ఇదేనా?

దాదాపు రెండు ద‌శాబ్దాలుగా బాలీవుడ్లో హీరోగా కొన‌సాగుతున్నాడు షాహిద్ క‌పూర్. స్టార్ ఇమేజ్ ఎప్పుడో సంపాదించాడు కానీ.. సూప‌ర్ స్టార్ల స్థాయికి మాత్రం చేర‌లేక‌పోయాడు. వ‌సూళ్ల‌లో ఒక స్థాయిని మించి ఎద‌గ‌లేక‌పోయాడు. అలాంటి హీరోకు గ‌త ఏడాది భారీ విజ‌యాన్నందించి టాప్ లీగ్ హీరోల‌తో పోటీ ప‌డే స్థాయిని అందించింది క‌బీర్ సింగ్.

ఇది ‘అర్జున్ రెడ్డి’ సినిమాకు రీమేక్ అన్న సంగ‌తి తెలిసిందే. ఈ రీమేక్‌తో కెరీర్లోనే బిగ్గెస్ట్ హిట్ అందుకున్న షాహిద్ కపూర్.. వెంట‌నే మ‌రో తెలుగు రీమేక్‌ను లైన్లో పెట్టాడు. అదే.. ‘జెర్సీ’. ఈ సినిమా ఇప్ప‌టికే చిత్రీక‌ర‌ణ కూడా మొద‌లుపెట్టుకుంది. లాక్ డౌన్ లేకుంటే ఈ పాటికి పూర్త‌య్యేది కూడా.

ఐతే జెర్సీ రీమేక్ ఇంకా పూర్తి కాకుండానే షాహిద్ వ‌రుస‌గా మూడో రీమేక్‌కు ఓకే చెప్పిన‌ట్లు వార్త‌లొస్తున్నాయి. అయితే ఈసారి చేయ‌బోయేది తెలుగు సినిమా కాదు కానీ.. సౌత్ మూవీ. అది తెలుగులో కూడా విడుద‌ల కాబోతోంది. ఆ చిత్ర‌మే.. ఆకాశ‌మే నీ హ‌ద్దురా. సూర్య హీరోగా తెలుగ‌మ్మాయి సుధ కొంగ‌ర త‌మిళ‌, తెలుగు భాష‌ల్లో రూపొందించిన చిత్ర‌మిది.

ఇది ఒక నిజ జీవిత క‌థే. ఎయిర్ డెక్కన్ ఫౌండర్ జీఆర్ గోపీనాథ్ జీవిత కథ ఆధారంగా తెరకెక్కించింది సుధ‌. టీజ‌ర్‌తోనే చాలా ప్రామిసింగ్‌గా క‌నిపించిందీ సినిమా. ఈ చిత్రం గురించి తెలుసుకున్న షాహిద్ రీమేక్‌లో న‌టించ‌డానికి ఓకే చెప్పాడ‌ట‌. నిర్మాత గునీత్ మోంగా రీమేక్ హ‌క్కులు కొన్నాడ‌ట‌. ద‌ర్శ‌కుడు, ఇత‌ర వివ‌రాలు త్వ‌ర‌లోనే వెల్ల‌డ‌వుతాయ‌ట‌.