భీమ్లా.. రికార్డు కొడుతున్నట్లేనా?

ఒకప్పుడు తెలుగు సినిమాలు యుఎస్‌లో ఏ స్థాయిలో వసూళ్ల ప్రభంజనం సృష్టించేవో అందరికీ తెలిసిందే. మంచి క్రేజున్న సినిమాలకు ప్రిమియర్స్‌తోనే మిలియన్ డాలర్ల వసూళ్లు వచ్చేవి. ఐతే కొవిడ్,ఇతర కారణాల వల్ల మూడేళ్లుగా ఏ తెలుగు చిత్రానికీ యుఎస్‌లో ప్రిమియర్స్‌తో మిలియన్ డాలర్ల వసూళ్లు రాలేదు. చివరగా ఈ ఘనత అందుకున్నది పవర్ స్టార్ పవన్ కళ్యాణ్ సినిమా ‘అజ్ఞాతవాసి’ కావడం గమనార్హం. ఆ సినిమా పవన్ కెరీర్లోనే బిగ్గెస్ట్ డిజాస్టర్ అయినప్పటికీ.. విడుదలకు ముందు దానికి క్రేజ్ మామూలుగా లేదు.

దీంతో యుఎస్ ప్రిమియర్స్‌‌కు వసూళ్ల మోత మోగిపోయింది. ఏకంగా 1.4 మిలియన్ డాలర్లను కేవలం ప్రిమియర్స్‌తోనే వసూలు చేసింది ‘అజ్ఞాతవాసి’. బాహుబలి: ది బిగినింగ్, ఖైదీ నంబర్ 150 చిత్రాల రికార్డులను ఆ సినిమా బద్దలు కొట్టింది. ఐతే తర్వాతి మూడేళ్లలో మరే చిత్రం కూడా ఈ రికార్డును టచ్ చేయలేకపోయింది. కొవిడ్ దెబ్బకు యుఎస్‌లో భారతీయ చిత్రాలన్నింటికీ వసూళ్లు పడిపోయాయి. ఇప్పుడిప్పుడే అక్కడ బాక్సాఫీస్ పుంజుకుంటోంది.

ఇలాంటి టైంలో పవన్ కళ్యాణ్ సినిమానే మళ్లీ ప్రిమియర్స్‌తో మిలియన్ డాలర్ల మార్కును అందుకునే సూచనలు కనిపిస్తున్నాయి. ఈ చిత్ర విడుదల విషయంలో విపరీతమైన సందిగ్ధత నడిచింది. నాలుగు రోజుల కిందటే దీని రిలీజ్ ఖరారైంది. ఇలా డేట్ ఇచ్చారో లేదో అలా యుఎస్ ప్రిమియర్స్‌కు బుకింగ్స్ మొదలుపెట్టేశారు.

ప్రిమియర్స్‌కు ఐదు రోజుల ముందే ఈ చిత్రం అడ్వాన్స్ బుకింగ్స్‌తో 2 లక్షల డాలర్ల మార్కును దాటేయడం విశేషం. ఈ ఊపు చూస్తుంటే ప్రిమియర్స్ పూర్తయ్యేసరికి వసూళ్లు మిలియన్ డాలర్ల మార్కును అందుకోవడం కష్టమేమీ కాదనిపిస్తోంది. ట్రైలర్ రిలీజయ్యాక హైప్ మరింత పెరుగుతుంది కాబట్టి ఈ రికార్డు అందుకోవడం సాధ్యమే అనిపిస్తోంది. అలా కాని పక్షంలో 8-9 లక్షల డాలర్ల మధ్య సెటిలయ్యే ఛాన్సులున్నాయి. సినిమాకు పాజిటివ్ టాక్ వస్తే మాత్రం వీకెండ్లో 2 మిలియన్ మార్కును అందుకునే అవకాశాలు పుష్కలంగా ఉన్నాయి.