భీమ్లా క్లారిటీ.. గని ఫిక్స్?

తెలుగులో మళ్లీ పేరున్న సినిమాల సందడి మొదలవుతోంది. ఈ వారాంతానికి ‘ఖిలాడి’ లాంటి పెద్ద సినిమా షెడ్యూల్ అయింది. దాంతో పాటు డీజే టిల్లు, సెహరి లాంటి చిన్న సినిమాలు కూడా రేసులోకి దిగుతున్నాయి. తర్వాతి వారం సంగతేంటో క్లారిటీ లేదు. ఐతే ఈ నెలలో అందరి దృష్టినీ ఆకర్షిస్తున్నది శివరాత్రి వీకెండే. ఫిబ్రవరి 25న ముందు అనుకున్న ప్రకారం అయితే ‘భీమ్లా నాయక్’ రావాలి. కానీ ఆ రోజున ఆ చిత్రాన్ని దించే సూచనలు కనిపించడం లేదు.

కుదిరితే ఫిబ్రవరి 25న లేదంటే ఏప్రిల్ 1న ఈ చిత్రాన్ని రిలీజ్ చేస్తామని ప్రకటించారు. కానీ తొలి డేట్‌కు సినిమాను దించడం అసాధ్యమనే అనిపిస్తోంది. ఆ దిశగా ఎలాంటి సంకేతాలు లేవు. దీంతో ఆడవాళ్లు మీకు జోహార్లు, సెబాస్టియిన్ అనుకున్నట్లే ఆ తేదీకి రావడం ఖాయంగా కనిపిస్తోంది. అలాగే తమిళ అనువాద చిత్రం ‘వలిమై’ కూడా అదే రోజు రిలీజ్ కాబోతోంది. వీటికి తోడు ఇంకో సినిమా కూడా శివరాత్రి వీకెండ్‌ను టార్గెట్ చేయబోతోంది.

అదే.. గని. డిసెంబర్లోనే రావాల్సిన ఈ చిత్రాన్ని వాయిదా వేసుకుంటూ వచ్చారు. చివరగా ప్రకటించిన ప్రకారం ఫిబ్రవరి 25న లేదా మార్చి 4న ఈ చిత్రాన్ని రిలీజ్ చేస్తామని ప్రకటించారు. ‘భీమ్లా నాయక్’ విడుదల విషయంలో స్పష్టతను బట్టి ఒక డేట్‌ను ఎంచుకోవాలన్నది చిత్ర బృందం ఆలోచన. ఐతే ఇప్పుడు ‘గని’ మేకర్స్.. ‘భీమ్లా నాయక్’ నిర్మాతలతో మాట్లాడి ఒక స్పష్టత తెచ్చేసుకున్నట్లు సమాచారం.

‘భీమ్లా నాయక్’ను ఏ రకంగా చూసినా ఫిబ్రవరి 25న రిలీజ్ చేయడం మంచిది కాదన్న ఉద్దేశంతోనే నిర్మాతలు ఉన్నారట. ఏప్రిల్ 1కి సినిమా వాయిదా పడటం లాంఛనమే. ఈ మేరకు క్లారిటీ వచ్చేయడంతో ‘గని’ని ఫిబ్రవరి 25నే దించేయాలని చూస్తున్నారట. ఈ మేరకు ఒకట్రెండు రోజుల్లో ప్రకటన వస్తుందని సమాచారం. ‘గని’ ఖాయమైతే.. ‘సెబాస్టియన్’ శివరాత్రి రేసు నుంచి తప్పుకుంటుంది. గని, ఆడవాళ్లు మీకు జోహార్ల, వలిమై ఆ వీకెండ్లో పోటీ పడతాయి.