నాగశౌర్యకు మెగా ఛాన్స్.. కీర్తికి జోడీగా!

టాలీవుడ్ యంగ్ హీరో నాగశౌర్య మొదటినుంచి కూడా సరికొత్త కథలను ఎన్నుకుంటూ కెరీర్ పరంగా దూసుకుపోతున్నారు. ఓ పక్క హీరోగా సినిమాలు చేస్తూనే అప్పుడప్పుడు వేరే సినిమాల్లో స్పెషల్ రోల్స్ చేస్తుంటాడు. ‘ఓ బేబీ’ సినిమా ఇదే కోవలోకి వస్తుంది. అందులో సమంత మెయిన్ లీడ్ కాగా.. నాగశౌర్య ఆమెని ప్రేమించే పాత్రలో కనిపిస్తాడు. ఇప్పుడు అలాంటి ఆఫరే శౌర్యకి మరొకటి వచ్చినట్లు తెలుస్తోంది. స్టార్ హీరోయిన్ కీర్తి సురేష్ కి జంటగా కనిపించే రోల్ అని సమాచారం.

మెగాస్టార్ చిరంజీవి, మెహర్ రమేష్ కాంబినేషన్ లో ‘భోళాశంకర్’ అనే సినిమా తెరకెక్కుతోన్న సంగతి తెలిసిందే. ఇందులో చిరుకి చెల్లెలి పాత్రలో కీర్తి సురేష్ నటిస్తోంది. ఆమెకి జోడీగా నాగశౌర్యను తీసుకోవాలని భావిస్తున్నారు. రీసెంట్ గానే అతడితో సంప్రదింపులు జరిపారు. కానీ ఇప్పటివరకు ఆయన ఎలాంటి నిర్ణయం తీసుకోలేదని తెలుస్తోంది.

క్రేజీ ప్రాజెక్ట్ కాబట్టి శౌర్య నో చెప్పే అవకాశాలు లేవనే చెప్పాలి. చిరు సినిమా.. కీర్తి సురేష్ కి జోడీగా అంటే కచ్చితంగా పాత్రకు మంచి ప్రాముఖ్యత ఉంటుంది. ఒకట్రెండు రోజుల్లో ఈ విషయంపై క్లారిటీ రానుంది. ఈ ఏడాది రెండు సినిమాలతో ప్రేక్షకుల ముందుకు వచ్చిన నాగశౌర్య.. ప్రస్తుతం మూడు సినిమాలను లైన్ లో పెట్టారు. వీటితో పాటు ‘సినిమా బండి’ డైరెక్టర్ తో మరో సినిమా ఓకే చేసినట్లు సమాచారం. మొత్తానికి ఈ యంగ్ హీరో వచ్చే ఏడాది మొత్తం బిజీ బిజీగా గడపనున్నారన్నమాట!