నాని ఫ్రెండ్ కోసం సెర్చింగ్!

నేచురల్ స్టార్ నాని వరుస సినిమాలను లైన్ లో పెడుతున్నారు. గత రెండేళ్లలో ఆయన నటించిన సినిమాలు ఓటీటీలో విడుదలయ్యాయి. అయితే ‘శ్యామ్ సింగరాయ్’ సినిమాతో ప్రేక్షకులను థియేటర్లలో అలరించడానికి సిద్ధమవుతున్నారు నాని. ప్రస్తుతం ఈ హీరో వివేక్ ఆత్రేయ దర్శకత్వంలో ‘అంటే సుందరానికీ’ అనే సినిమాలో నటిస్తున్నారు. ఇది పూర్తి కాకుండానే.. ‘దసరా’ అనే మరో సినిమాను మొదలుపెట్టారు. రీసెంట్ గా ఈ సినిమాకి సంబంధించిన అధికార ప్రకటన వచ్చింది. ఈ సినిమా పోస్టర్ లో నాని రగ్డ్ లుక్ చూసిన అభిమానులు ఆశ్చర్యపోయారు.

తొలిసారి నాని ఈ సినిమాలో తెలంగాణ యాసలో డైలాగ్స్ చెప్పనున్నారు. సింగరేణి కోల్ మైన్స్ నేపథ్యంలో ఈ సినిమాను రూపొందిస్తున్నారు. శ్రీకాంత్ ఓదెల అనే కొత్త దర్శకుడు తెరకెక్కిస్తోన్న ఈ సినిమాలో హీరోతో పాటు అతడి ఫ్రెండ్ క్యారెక్టర్ ఒకటి ఉంటుందట. సినిమాకి ఆ పాత్ర చాలా కీలకమని చెబుతున్నారు. సినిమాలో చాలా సన్నివేశాలు ఈ ఫ్రెండ్షిప్ బాండ్ మీదే ఉంటాయని సమాచారం. దీంతో ఆ పాత్రలో మరో యంగ్ హీరోని తీసుకుంటేనే కరెక్ట్ అని చిత్రబృందం భావిస్తోంది.

దీనికోసం ఇప్పటికే పేరున్న ఇద్దరు హీరోలను సంప్రదించారట. వారిద్దరిలో ఎవరైనా ఓకే చెబితే.. సినిమాకి మరో ఎట్రాక్షన్ యాడ్ అవుతుందని భావిస్తున్నారు. మరి నానితో స్క్రీన్ షేర్ చేసుకోవడానికి ఏ హీరో ముందుకొస్తారో చూడాలి. ఈ సినిమాలో హీరోయిన్ గా కీర్తి సురేష్ కనిపించనుంది. అలానే సముద్రఖని, సాయి కుమార్, జరీనా వాహబ్ లాంటి తారలు కీలకపాత్రల్లో కనిపించనున్నారు. ప్రముఖ సంగీత దర్శకుడు సంతోష్ నారాయణన్ ఈ సినిమా మ్యూజిక్ అందించనున్నారు.