ప‌వ‌న్ రికార్డును దాటేసిన చైతూ

తెలుగు ప్రేక్ష‌కులు ఎంత‌గానో ఎదురు చూస్తున్న సినిమా రానే వ‌చ్చింది. ఫిదా లాంటి బ్లాక్‌బ‌స్ట‌ర్ త‌ర్వాత శేఖ‌ర్ క‌మ్ముల రూపొందించిన ఆ చిత్ర‌మే.. ల‌వ్ స్టోరి. నాగ‌చైత‌న్య‌, సాయిప‌ల్ల‌విల క్రేజీ కాంబినేష‌న్లో తెర‌కెక్కిన ఈ చిత్రంపై అంచ‌నాలు ఏ స్థాయిలో ఉన్నాయో కొత్త‌గా చెప్పాల్సిన ప‌ని లేదు. క‌రోనా సెకండ్ వేవ్ త‌ర్వాత ప్రేక్ష‌కుల‌ను పూర్తి స్థాయిలో థియేట‌ర్ల‌కు ర‌ప్పించే స‌త్తా ఉన్న సినిమాగా దీనిపై ఆశ‌లు పెట్టుకుంది టాలీవుడ్. ఆ అంచ‌నాల‌ను ఈ సినిమా పూర్తిగా అందుకుంది.

తొలి రోజు రెండు తెలుగు రాష్ట్రాల్లో ప్యాక్డ్ హౌస్‌ల‌తో న‌డుస్తోంది ల‌వ్ స్టోరి. ఒక భారీ చిత్రం స్థాయిలో రిలీజైన ఈ సినిమాకు అడ్వాన్స్ బుకింగ్స్ ఓ రేంజిలో జ‌రిగాయి. ఇక రిలీజ్ రోజు థియేట‌ర్ల ద‌గ్గ‌ర హ‌డావుడి మామూలుగా లేదు. నాగ‌చైత‌న్య కెరీర్లో హైయెస్ట్ డే-1 గ్రాస‌ర్‌గా ల‌వ్ స్టోరి నిల‌వ‌డం లాంఛ‌న‌మే. మిడ్ రేంజ్ సినిమాల్లో ఈ చిత్రం కొత్త రికార్డులు నెల‌కొల్పే అవ‌కాశ‌మూ ఉంది.

ఇక యుఎస్ బాక్సాఫీస్‌లో ల‌వ్ స్టోరి ప్ర‌కంప‌న‌లే రేపుతోంది. క‌రోనా ఫ‌స్ట్ వేవ్ త‌ర్వాత అత్య‌ధిక ప్రిమియ‌ర్ వ‌సూళ్లు సాధించిన చిత్రంగా ల‌వ్ స్టోరి రికార్డు నెల‌కొల్ప‌డం విశేషం. ఇప్ప‌టిదాకా ఆ రికార్డు ప‌వ‌న్ క‌ళ్యాణ్ సినిమా వ‌కీల్ సాబ్ పేరిట ఉంది. గ‌త ఏడాది మార్చిలో క‌రోనా ప్ర‌భావం మొద‌లయ్యాక ఇప్ప‌టి వ‌ర‌కు విడుద‌లైన ఏకైక బిగ్ స్టార్ మూవీ అది. యుఎస్‌లో ప్రిమియ‌ర్స్ ద్వారా ఆ చిత్రం 3 ల‌క్ష‌ల‌ డాల‌ర్లు క‌లెక్ట్ చేసింది. ఇప్పుడా వ‌సూళ్ల‌ను ల‌వ్ స్టోరి అధిగ‌మించింది.

ఈ చిత్రానికి గురువారం ప్రిమియ‌ర్ల ద్వారా 3.06 ల‌క్ష‌ల డాల‌ర్ల వ‌సూళ్లు వ‌చ్చాయి. యుఎస్‌లో క‌రోనా ధాటికి ఇండియన్ సినిమాల మార్కెట్ బాగా దెబ్బ తినేసిన టైంలో ఈ చిత్రానికి ఈ స్థాయిలో వ‌సూళ్లు రావ‌డం అనూహ్యం. ఈ ఏడాది యుఎస్‌లో సౌత్ ఇండియ‌న్ సినిమాల్లో అత్య‌ధిక ప్రిమియ‌ర్ వ‌సూళ్లు సాధించిన చిత్రంగానూ ల‌వ్ స్టోరి రికార్డు నెల‌కొల్ప‌డం విశేషం.