బుట్టబొమ్మను మళ్లీ రిపీట్ చేస్తాడా..?

ప్రస్తుతం సినిమా ఇండస్ట్రీలో పూజాహెగ్డే అందరికీ హాట్ ఫేవరెట్ గా మారింది. స్టార్ హీరోలు తమ సినిమాల్లో పూజాను హీరోయిన్ గా తీసుకోవడానికి ఆసక్తి చూపిస్తున్నారు. కొందరు హీరోలైతే ఆమెని రిపీట్ చేస్తున్నారు కూడా. ఇప్పుడు టాలీవుడ్ స్టార్ హీరో అల్లు అర్జున్ మరోసారి పూజాతో కలిసి రొమాన్స్ చేయడానికి రెడీ అవుతున్నాడని సమాచారం. ఇప్పటివరకు వీరిద్దరూ కలిసి ‘దువ్వాడ జగన్నాథం’, ‘అల.. వైకుంఠపురములో’ వంటి సినిమాల్లో నటించారు.

ఈ రెండు సినిమాలు భారీ విజయాలను అందుకున్నాయి. ‘అల.. వైకుంఠపురములో’ సినిమా ఇండస్ట్రీ రికార్డులను బద్దలు కొట్టింది. నిజానికి అల్లు అర్జున్ తన సినిమాల్లో హీరోయిన్లను రిపీట్ చేయడానికి ఇష్టపడరు. కానీ పూజాహెగ్డేతో మాత్రం రెండు సార్లు కలిసి పని చేశారు. ఇప్పుడు ఈ జంట మరోసారి వెండితెరపై అలరించబోతుందని టాక్. బన్నీ హీరోగా దర్శకుడు వేణు శ్రీరామ్ ‘ఐకాన్’ సినిమాను రూపొందించనున్న సంగతి తెలిసిందే.

ఈ సినిమాలో పూజాహెగ్డేను హీరోయిన్ గా తీసుకోవాలని వేణుశ్రీరామ్ భావిస్తున్నారు. కానీ ఈ విషయంలో అల్లు అర్జున్ ఇంకా ఎలాంటి నిర్ణయం తీసుకోలేదని తెలుస్తోంది. ప్రస్తుతం పూజాహెగ్డే చాలా బిజీగా ఉంది. తెలుగుతో పాటు తమిళ, హిందీ భాషల్లో సినిమాలు ఒప్పుకుంది. రీసెంట్ గా మహేష్-త్రివిక్రమ్ సినిమా కూడా సైన్ చేసింది. ఇలాంటి సమయంలో బన్నీకి డేట్స్ కేటాయించగలదో లేదో మరి..!