కొత్త సినిమాకు అదిరిపోయే రివ్యూలు

దేశవ్యాప్తంగా థియేటర్లు మూతపడి ఉన్నప్పటికీ.. కొత్త సినిమాల విడుదల ఏమీ ఆగట్లేదు. తెలుగులో తక్కువే కానీ.. వేరే భాషల్లో ఓటీటీల ద్వారా కొత్త చిత్రాలు బాగానే రిలీజవుతున్నాయి. కొన్ని చిత్రాలకు మంచి హైప్ కూడా వస్తోంది.

అందులో ఒకటి మలయాళ చిత్రం.. మాలిక్. గత దశాబ్ద కాలంలో దేశంలోనే అత్యుత్తమ నటుల్లో ఒకడిగా పేరు తెచ్చుకున్న ఫాహద్ ఫాజిల్ ఇందులో ప్రధాన పాత్ర పోషించాడు. ‘విశ్వరూపం’ సహా ఎన్నో చిత్రాలకు ఎడిటర్‌గా పని చేసి గత ఏడాదే.. ‘సీ యూ సూన్’ అనే వెరైటీ సినిమాతో దర్శకుడిగా మారిన మహేష్ నారాయణన్ దీనికి దర్శకుడు.

ఈ చిత్రాన్ని అమేజాన్ ప్రైమ్ నిన్న రాత్రి 10 గంటలకు రిలీజ్ చేసింది. ట్రైలర్ చూసి ఫాహద్ కెరీర్లో మరో మేటి చిత్రం అవుతుందన్న అంచనాలు కలిగాయి. సినిమా ఆ అంచనాలకు ఏమాత్రం తగ్గలేదని అంటున్నారు చూసిన వాళ్లందరూ.

ఇటు క్రిటిక్స్ ఇస్తున్న రివ్యూలు.. అటు నెటిజన్లు ఇస్తున్న ఫీడ్ బ్యాక్ చూస్తుంటే.. ఈ ఏడాది ఇండియాలో వచ్చిన బెస్ట్ ఫిల్మ్స్‌లో ‘మాలిక్’ ఒకటి అని అర్థమవుతోంది. గత కొన్నేళ్లలో ఓటీటీల విప్లవం కారణంగా మలయాళ సినిమాలను ఇతర భాషల వాళ్లూ విరగబడి చూస్తున్నారు. ఫాహద్ ఎంత గొప్ప నటుడో అందరికీ బాగానే అర్థమైంది.

అతను ఓ సినిమాలో నటించాడంటే అది స్పెషల్‌గానే ఉంటుందని, సినిమా అటు ఇటుగా ఉన్నా ఫాహద్ పెర్ఫామెన్స్ కోసమే సినిమా చూడొచ్చనే నమ్మకంతో ఉన్నారు. ‘మాలిక్’లో అతడి పెర్ఫామెన్స్‌ను కెరీర్లో వన్ ఆఫ్ ద బెస్ట్‌గా చెబుతున్నారు.

డిఫరెంట్ షేడ్స్, లుక్స్ ఉన్న క్యారెక్టర్లో ఫాహద్ పెర్ఫామెన్స్ మైండ్ బ్లోయింగ్ అంటున్నారు. ‘గాడ్ ఫాదర్’ స్టయిల్లో సినిమాను కూడా ఆద్యంతం ఆసక్తికరంగా, ఉత్కంఠభరితంగా తీర్చిదిద్దాడట మహేష్ నారాయణన్. ఈ ఏడాది మస్ట్ వాచ్ సినిమాల్లో ఇదొకటని తీర్మించేస్తున్నారు అందరూ.