తేజుతో అనుకున్న‌ది స‌త్య‌దేవ్‌తో

స‌త్య‌దేవ్ పుట్టిన రోజు సంద‌ర్భంగా ఆదివారం అత‌డి కొత్త చిత్రం ఒక‌టి ప్ర‌క‌టించ‌డం తెలిసిందే. అగ్ర ద‌ర్శ‌కుడు కొర‌టాల శివ స‌మ‌ర్ప‌ణ‌లో అరుణాచ‌ల క్రియేష‌న్స్ బేన‌ర్ మీద కృష్ణ కోమ‌ల‌పాటి ఈ చిత్రాన్ని నిర్మిస్తున్నాడు. వీవీ గోపాల‌కృష్ణ అనే కొత్త ద‌ర్శ‌కుడు ఈ సినిమాతో టాలీవుడ్లోకి అరంగేట్రం చేస్తున్నాడు. ఈ సినిమాకు భ‌గ‌వ‌ద్గీత సాక్షిగా అనే టైటిల్ ప‌రిశీల‌న‌లో ఉంది. ఈ పేరుతో ఓ సినిమా రాబోతోందంటూ చాన్నాళ్ల నుంచే టాలీవుడ్లో చ‌ర్చ న‌డుస్తోంది. దీని ద‌ర్శ‌కుడు చాలా చోట్ల ఈ క‌థ‌ను వినిపించాడు.

ఒక ద‌శ‌లో సీనియ‌ర్ నిర్మాత‌ ఠాగూర్ మ‌ధు ఈ సినిమాను నిర్మించ‌డానికి ముందుకొచ్చాడు. త‌ర్వాత ఆ క‌థ వేరే కాంపౌండ్ల‌లో తిరిగింది. సాయిధ‌ర‌మ్ తేజ్ ఈ క‌థ విని సినిమా చేయ‌డానికి బాగా ఆస‌క్తి చూపించాడు. అత‌డితో ఈ సినిమా మొద‌లు కావ‌డ‌మే ఆల‌స్యం అని ప్ర‌చారం జ‌రిగింది. కానీ ఇంత‌లో ఏమైందో ఏమో.. తేజు ఈ చిత్రం నుంచి తప్పుకున్నాడు. చివ‌రికి ఇప్పుడు స‌త్య‌దేవ్ హీరోగా భ‌గ‌వ‌ద్గీత సాక్షిగా క‌థ‌ను ప‌ట్టాలెక్కించారు. కొర‌టాల శివ లాంటి పేరున్న ద‌ర్శ‌కుడు ఈ క‌థ‌కు ఆమోద ముద్ర వేసి, ఈ చిత్రానికి స‌మ‌ర్ప‌కుడిగా వ్య‌వ‌హ‌రిస్తుండ‌టంతో ఇదొక స్పెష‌ల్ ఫిలిం అవుతుంద‌నే అంచ‌నాలున్నాయి.

ఈ స్టోరీ రెవ‌ల్యూష‌న‌రీగా ఉంటుంద‌ని.. ముగింపు ప్రేక్ష‌కుల‌ను షాక్‌కు గురి చేస్తుంద‌ని అంత‌ర్గ‌త వ‌ర్గాల స‌మాచారం. సుశాంత్ సినిమా ఇచట వాహ‌న‌ములు నిలప‌రాదుకు ప‌ని చేసిన‌ సురేష్ బాబా అనే యువ ర‌చ‌యిత ఈ చిత్రానికి స్క్రిప్టు స‌హ‌కారం అందించాడు. మంచి క‌థ ప‌డితే దాన్ని మ‌రో స్థాయికి తీసుకెళ్లే స‌త్య‌దేవ్ లాంటి టాలెంటెడ్ న‌టుడు ఇందులో హీరోగా న‌టిస్తుండ‌టంతో ఇదొక ప్రామిసింగ్ మూవీ అయ్యే అవ‌కాశాలున్నాయి.