హైదరాబాద్ అమ్మాయితో ప్రేమలో ఉన్నా.. అడివి శేష్ కామెంట్స్!

నటుడు అడివి శేష్ తనకంటూ ప్రత్యేకమైన గుర్తింపును సంపాదించుకున్నాడు. ‘క్షణం’, ‘గూఢచారి’ లాంటి సినిమాలతో ఇతడి క్రేజ్ మరింత పెరిగింది. తన సినిమాలకు తనే కథలు రాసుకుంటూ ఉంటారు ఈ హీరో. యూత్ లో అడివి శేష్ కి మంచి ఫాలోయింగ్ ఏర్పడింది. తరచూ సినిమా అప్డేట్స్ తో వార్తల్లో నిలిచే ఈ హీరో తొలిసారి తన లవ్ లైఫ్ గురించి మాట్లాడారు. గతంలో ఈ హీరో బాలీవుడ్ నటితో ప్రేమలో ఉన్నట్లు వార్తలు వినిపించాయి. కానీ వాటిపై అడివి శేష్ స్పందించలేదు.

తాజాగా ఓ ఇంటర్వ్యూలో పాల్గొన్న ఈ యంగ్ హీరో ప్రస్తుతం తను ప్రేమలో ఉన్న విషయాన్ని కన్ఫర్మ్ చేశారు. హైదరాబాద్ కి చెందిన ఓ అమ్మాయిని చాలా కాలంగా ప్రేమిస్తున్నట్లు చెప్పిన అడివి శేష్ ఆ అమ్మాయి వివరాలను మాత్రం బయటపెట్టలేదు. తన వ్యక్తిగత విషయాలను పబ్లిక్ గా చెప్పడానికి సిద్ధంగా లేనని.. ఈ విషయంలో ఇంకా తన ప్రేయసి పర్మిషన్ కూడా తీసుకోలేదని.. తనతో చర్చించిన తరువాత అఫీషియల్ గా అనౌన్స్ చేస్తానని చెప్పారు.

ప్రేమలో ఉన్నప్పటికీ.. ఇప్పట్లో పెళ్లి చేసుకునే ఆలోచన లేదని చెప్పారు. కెరీర్ పరంగా చాలా బిజీగా ఉన్నానని.. పడుకోవడానికి కూడా సమయం సరిపోవడం లేదని.. ఇలాంటి సమయంలో కొత్త బాధత్యలు తీసుకోలేనని చెప్పారు. ప్రస్తుతం ఈ హీరో మహేష్ బాబు ప్రొడక్షన్ లో ‘మేజర్’ అనే సినిమాలో నటిస్తున్నారు. అలానే ‘హిట్’ సినిమా సీక్వెల్ లో, ‘గూఢచారి’ సీక్వెల్ లతో బిజీగా ఉన్నారు.