బ్రహ్మాజీ ‘హ్యాంగ్‌మ్యాన్’.. ఓటీటీ రిలీజ్!

తెలుగు సినిమా ప్రేక్షకులను పరిచయం అక్కర్లేని పేరు బ్రహ్మాజీ. సరికొత్త పాత్రలు, మేనరిజమ్స్ తో ప్రేక్షకులను ఆకట్టుకుంటున్నాడు. హాస్యనటుడిగా, క్యారెక్టర్ ఆర్టిస్ట్ గా, విలన్ గా రకరకాల పాత్రలు పోషించి టాలీవుడ్ లో తనకంటూ ఓ ఇమేజ్ ను క్రియేట్ చేయగలిగాడు. చాలా కాలంగా క్యారెక్టర్ ఆర్టిస్ట్ గా నటిస్తోన్న ఆయన కొన్నాళ్లక్రితం ‘హ్యాంగ్‌మ్యాన్’ అనే సినిమాలో మెయిన్ లీడ్ గా నటించబోతున్నట్లు అనౌన్స్ చేశారు. ఈ సినిమాకి సంబంధించిన ఫస్ట్ లుక్ ను కూడా వదిలారు.

ఈ ఫస్ట్ లుక్ లో చేతిలో పెద్ద చేప పట్టుకొని.. కాస్త నెరసిన జుట్టుతో కనిపించి ఆశ్చర్యపరిచాడు బ్రహ్మాజీ. అయితే ఈ సినిమా షూటింగ్ పూర్తి కావడంతో ఇప్పుడు డబ్బింగ్ పనులు షురూ చేశారు. బ్రహ్మాజీ ప్రస్తుతం తన పాత్రకు డబ్బింగ్ చెబుతున్నట్లు తెలుస్తోంది. అయితే ముందుగా ఈ సినిమాను ఇంటర్నేషనల్ ఫిలిం ఫెస్టివల్ కి పంపించాలని దర్శకనిర్మాతలు ప్లాన్ చేస్తున్నారు. ఆ విధంగా సినిమాకు బజ్ తీసుకురావాలని భావిస్తున్నారు.

ఆ తరువాత సినిమాను ఓటీటీలో రిలీజ్ చేయాలని నిర్ణయించుకున్నారు. దీనికోసం నెట్ ఫ్లిక్స్ లాంటి సంస్థతో డీల్ కుదుర్చుకోవాలని చర్చలు జరుపుతున్నారు. క్రైమ్ డ్రామా జోనర్ లో తెరకెక్కిన ఈ సినిమాను నిజజీవిత సంఘటనల ఆధారంగా రూపొందించారు. కథ ప్రకారం.. బ్రహ్మాజీ తలారి పాత్రను పోషిస్తున్నారు. క్లోరో ఫిలిం పిక్చర్స్ బ్యానర్ నిర్మాణంలో విహాన్ దర్శకత్వంలో ఈ సినిమా తెరకెక్కింది. ఈ చిత్రానికి కమ్రాన్ సంగీతం అందిస్తున్నారు.