ఫ్యామిలీ మ్యాన్-2.. సెంటిమెంటును బ్రేక్ చేస్తుందా?

అటు ఇటుగా ఇంకో వారం రోజుల్లోనే ప్రేక్షకుల ముందుకు రావాల్సి ఉంది ‘ఫ్యామిలీ మ్యాన్-2’. ఇండియాలో బిగ్గెస్ట్ హిట్‌గా నిలిచిన వెబ్ సిరీస్ ఇది అనడంలో సందేహం లేదు. రాజ్-డీకేల దర్శకత్వంలో అమేజాన్ ప్రైమ్ నిర్మించిన ఈ వెబ్ సిరీస్‌‌ తొలి సీజన్ స్ట్రీమ్ అయిన కొన్ని నెలల నుంచి సెకండ్ సీజన్ గురించి ఊరిస్తూ వస్తున్నారు. కరోనా సహా కొన్ని కారణాల వల్ల ఆలస్యమైన రెండో సీజన్.. ఎట్టకేలకు విడుదలకు సిద్ధమైంది.

ఐతే తమిళ టైగర్లను చెడుగా చూపించారని ఆరోపిస్తూ ఈ సిరీస్‌ను బ్యాన్ చేయాలనే డిమాండ్లు తమిళుల నుంచి వినిపిస్తున్నాయి. కేంద్ర ప్రభుత్వానికి ఈ మేరకు లేఖలు కూడా వెళ్లాయి. మరి ప్రభుత్వం ఏం నిర్ణయం తీసుకుంటుందో చూడాలి. ఈ అడ్డంకులను అధిగమించి అనుకున్న ప్రకారమే జూన్ 4న ప్రైమ్‌లో ‘ఫ్యామిలీ మ్యాన్-2’ స్ట్రీమ్ అవుతుందనే అభిమానులు ఆశిస్తున్నారు.

ఇదిలా ఉంటే ‘ఫ్యామిలీ మ్యాన్’ రెండో సీజన్ మీద ఉన్న అంచనాలను రాజ్-డీకే ఏ మేరకు అందుకుంటారన్నది ఇప్పుడు ప్రశ్న. ఇండియన్ ఫిలిం ఇండస్ట్రీలో సీక్వెల్స్ అనుకున్న మేర ఆడిన దాఖలాలు తక్కువ. మెజారిటీ సీక్వెల్స్ అంచనాలను అందుకోలేదు. వెబ్ సిరీస్‌ల విషయంలోనూ ఇదే జరిగింది. ‘మీర్జాపూర్’ అందుకు ఉదాహరణ. అమేజాన్ ప్రైమ్‌లోనే రిలీజైన ఈ సిరీస్‌ తొలి సీజన్‌కు అద్భుత స్పందన వచ్చింది. ఇండియాలో వెబ్ సిరీస్‌లకు క్రేజ్ పెరగడానికి ఇది కూడా ఒక కారణమే.

ఐతే భారీ అంచనాల మధ్య వచ్చిన ‘మీర్జాపూర్-2’ మాత్రం ప్రేక్షకులను నిరాశకు గురి చేసింది. అర్జున్ రాంపాల్ నటించిన ‘ఆశ్రమ్’, అలాగే ‘ఔట్ ఆఫ్ లవ్’ సిరీస్‌ల రెండో సీజన్లు కూడా అంచనాలను అందుకోలేకపోయాయి. మరి ‘ఫ్యామిలీ మ్యాన్-2’ ఈ నెగెటివ్ సెంటిమెంటును బ్రేక్ చేస్తుందేమో చూడాలి. దీని ట్రైలర్ చూస్తే మాత్రం తొలి సీజన్‌కు దీటుగానే ఉంటుందనిపిస్తోంది. మరి జూన్ 4న ఈ సిరీస్ అనుకున్నట్లుగా విడుదలై ప్రేక్షకులను అలరిస్తుందని ఆశిద్దాం.