‘మహర్షి’కి జాతీయ అవార్డు.. ముందే చెప్పిన మహేష్

సూపర్ స్టార్ మహేష్ బాబు కెరీర్లో 25వ చిత్రంగా వచ్చిన ‘మహర్షి’ ఎంత పెద్ద విజయం సాధించిందో తెలిసిందే. కొంతమేర డివైడ్ టాక్‌ను కూడా తట్టుకుని నిలబడ్డ ఈ చిత్రం రూ.100 కోట్లకు పైగా వసూళ్లతో మహేష్ కెరీర్లో హైయెస్ట్ గ్రాసర్‌గా నిలిచింది. వ్యవసాయం ప్రాధాన్యాన్ని తెలియజెప్పే ఉదాత్తమైన కథాంశం ఇందులో మిళితమై ఉండటంతో ఈ చిత్రానికి విమర్శల ప్రశంసలూ దక్కాయి.

ఇప్పుడు ‘మహర్షి’ ఉత్తమ జనరంజక చిత్రంగా జాతీయ అవార్డును సైతం గెలుచుకుంది. ఈ సినిమాకు నృత్యరీతులు సమకూర్చిన రాజు సుందర్ నేషనల్ బెస్ట్ కొరియోగ్రాఫర్‌గానూ అవార్డు అందుకున్నారు. ఐతే ‘మహర్షి’ సినిమా సెట్స్ మీదికి వెళ్లడానికి ముందే.. ఈ చిత్రం జాతీయ అవార్డు గెలుస్తుందని మహేష్ బాబు అంచనా వేయడం విశేషం. దీనికి సంబంధించిన స్క్రీన్ షాట్‌ను షేర్ చేసి అందరినీ ఆశ్చర్యానికి గురి చేశాడు ఈ చిత్ర దర్శకుడు వంశీ పైడిపల్లి.

‘మహర్షి’ కంటే ముందు వంశీ తీసిన ‘ఊపిరి’కి గొప్ప ప్రశంసలు దక్కిన సంగతి తెలిసిందే. ఈ చిత్రానికి వంశీ ఫిలిం ఫేర్ అవార్డును కూడా గెలుచుకున్నాడు. ఆ సందర్భంగా మహేష్.. వంశీకి శుభాకాంక్షలు చెబుతూ ఒక మెసేజ్ పంపాడు. ఇందులో భాగంగా.. తర్వాతి సినిమాకు జాతీయ పురస్కారం అందుకుంటావని పేర్కొన్నాడు. బదులుగా కృతజ్ఞతలు చెబుతూ వంశీ.. అందుకోసం గట్టిగా ప్రయత్నిస్తానని అన్నాడు. దీనికి మహేష్ స్పందిస్తూ.. ఈ సినిమా కోసం ఏం కావాలన్నా చేయడానికి సిద్ధంగా ఉన్నానని, దీన్ని మరో స్థాయికి తీసుకెళ్లమని పేర్కొన్నాడు.

ఈ స్క్రీన్ షాట్‌ను ఇప్పుడు వంశీ షేర్ చేస్తూ.. మహేష్ చూపించిన నమ్మకం వల్లే ఇప్పుడు మహర్షికి ఈ పురస్కారం దక్కిందని.. తనపై ఆయనకెంత భరోసానో చెప్పడానికి ఇది నిదర్శనమని పేర్కొన్నాడు. ఈ స్క్రీన్ షాట్ చూసి.. మహేష్‌కు ‘మహర్షి’ మీద స్క్రిప్టు దశలోనే ఇంత గురి కుదిరిందా, జాతీయ అవార్డు గురించి అప్పుడే ఎలా చెప్పగలిగాడో అని ఆశ్చర్యపోతున్నారు అభిమానులు.