నాగార్జున‌తో సినిమానా.. వ‌ద్దు బాబోయ్

చిల‌సౌ అనే చిన్న సినిమాతో ద‌ర్శ‌కుడిగా తొలి ప్ర‌య‌త్నంలోనే మంచి మార్కులు వేయించుకున్నాడు రాహుల్ ర‌వీంద్ర‌న్. ఒక న‌టుడు ద‌ర్శ‌కుడిగా మారి ఇంత మంచి సినిమా తీస్తాడ‌ని ఎవ‌రూ ఊహించ‌లేదు. పెద్ద‌గా అంచ‌నాల్లేకుండా ఈ సినిమాకు వెళ్లిన ప్రేక్ష‌కులు ఆశ్చ‌ర్య‌పోయే ప‌నిత‌నం చూపించాడు రాహుల్.

ప్రేక్ష‌కుల్లాగే అక్కినేని నాగార్జున సైతం రాహుల్ వ‌ర్క్ చూసి ఇంప్రెస్ అయి అత‌డి ద‌ర్శ‌క‌త్వంలో స్వీయ నిర్మాణంలో సినిమా చేశాడు. అదే.. మ‌న్మ‌థుడు-2. కానీ ఈ సినిమా అంచ‌నాలను అందుకోవ‌డంలో ఘోరంగా విఫ‌ల‌మైంది. నాగ్ కెరీర్లో పెద్ద డిజాస్ట‌ర్‌గా నిలిచింది. ఆ దెబ్బ‌కు రాహుల్ కెరీర్ కూడా గాడి త‌ప్పింది. ఇప్ప‌టిదాకా ద‌ర్శ‌కుడిగా త‌న మూడో సినిమాను మొద‌లుపెట్ట‌లేకపోయాడు. ఐతే గీతా ఆర్ట్స్‌లో అత‌డి సినిమా ఓకే అయిన‌ట్లుగా వార్త‌లొస్తున్నాయి.

ఈ సంగ‌త‌లా ఉంచితే.. రాహుల్ తాజాగా త‌న ట్విట్ట‌ర్ ఫాలోవ‌ర్ల‌తో చిన్న చిట్ చాట్ చేశాడు. ఈ సంద‌ర్భంగా ఓ నెటిజ‌న్ రాహుల్ తర్వాతి ప్రాజెక్టు గురించి అడుగుతూ నాగార్జున కోసం యాక్ష‌న్ క‌థ రెడీ చేస్తున్న‌ట్లు అప్ప‌ట్లో చెప్పారు క‌దా, ఆ సినిమా ఎప్పుడు అని అడిగాడు. దీనికి రాహుల్ ఆశ్చ‌ర్య‌క‌ర స‌మాధానం ఇచ్చాడు.

మ‌న్మ‌థుడు-2 దెబ్బ‌కు నాగ్ అభిమానులు త‌న‌ను ఇప్ప‌టికీ తిట్టుకుంటున్నార‌ని.. కాబ‌ట్టి ఇప్పుడు నాగ్‌తో సినిమా వ‌ద్దులే అనేశాడు రాహుల్. భ‌విష్య‌త్తులో కుదిరితే నాగ్‌తో సినిమా చేస్తానేమో చూడాల‌ని.. అభిమానుల‌ను తాను సంతృప్తిప‌ర‌చ‌గ‌ల‌న‌ని అనుకున్న‌పుడు అది సాధ్య‌మ‌వుతుంద‌ని.. ప్ర‌స్తుతానికి మాత్రం ఈ విష‌యంలో నిరాశ ప‌రుస్తున్నందుకు క్షమించాల‌ని ఆ నెటిజ‌న్‌కు బ‌దులిచ్చాడు రాహుల్. మ‌న్మ‌థుడు-2 దెబ్బ‌కు తాను డిప్రెష‌న్లోకి వెళ్లాన‌ని గ‌తంలో చెప్పాడు రాహుల్. ఆ సినిమా అతణ్ని ఎంత‌గా నిరాశ‌ప‌రిచింద‌న‌డానికి తాజా వ్యాఖ్యలే ఉదాహ‌ర‌ణ‌.