సునీల్ హీరోగా ‘డీటీఎస్’

కామెడీ వేషాలతో కెరీర్ బ్రహ్మాండంగా సాగిపోతున్న సమయంలో హీరోగా మారి అదృష్టాన్ని పరీక్షించుకున్నాడు సునీల్. మొదట్లో ఆ ప్రయత్నం మంచి ఫలితాలనే ఇచ్చింది. అందాల రాముడు, మర్యాదరామన్న, పూల రంగడు లాంటి సినిమాలు మంచి విజయం సాధించాయి. సునీల్‌ను హీరోగా నిలబెట్టాయి. ఈ టైపు కామెడీ టచ్ ఉన్న సినిమాలే చేసుకుంటూ పోతే బాగానే ఉండేది.

కానీ తన అవతారం మార్చుకుని రెగ్యులర్ హీరోల్లా మాస్ సినిమాలు చేయాలని చూశాడు. డ్యాన్సులు, ఫైట్ల మీద మోజుతో గాడి తప్పాడు. కెరీర్‌ను చేజేతులా దెబ్బ తీసుకున్నాడు. హీరోగా రెండంకెల సంఖ్యలో ఫ్లాపులు ఎదురవడం, ఒక దశ దాటాక అతడి సినిమాలను ప్రేక్షకులు పూర్తిగా పట్టించుకోవడం మానేయడంతో ఇక హీరో వేషాలకు స్వస్తి చెప్పక తప్పలేదు. ఆ తర్వాత మళ్లీ కామెడీ రోల్స్‌ చేయడం మొదలుపెట్టాడు. క్యారెక్టర్, నెగెటివ్ రోల్స్ కూడా ట్రై చేశాడు. కానీ ఏవి కూడా పెద్దగా వర్కవుటైనట్లు కనిపించడం లేదు.

ఐతే ఇండస్ట్రీలో ఉన్న పలుకుబడితో సునీల్‌కు వేషాలైతే ఆగట్లేదు. ప్రస్తుతం ‘ఎఫ్-3’ సహా రెండు మూడు సినిమాల్లో నటిస్తున్న సునీల్‌.. మళ్లీ హీరోగా ఓ సినిమాకు తయారైపోవడం విశేషం. ఇది తెలుగు, కన్నడ భాషల్లో తెరకెక్కబోతుండటం గమనార్హం. ఈ చిత్రానికి ‘డీటీఎస్’ అనే టైటిల్ కూడా ఖరారు చేశారు.

‘డేర్ టు స్లీప్’ అనేది ఈ టైటిల్ పూర్తి రూపం. చేతన్ అనే యంగ్ కన్నడ హీరో ఇందులో కీలక పాత్ర చేస్తున్నాడు. డోనల్, నటాషా అనే కొత్తమ్మాయిలు కథానాయికలుగా నటిస్తున్నారు. అభిరామ్ పిల్ల దర్శకత్వంలో తెరకెక్కనున్న ఈ చిత్రానికి శ్రీకాంత్ దీపాల నిర్మాత. సాయికార్తీక్ ‘డీటీఎస్’కు సంగీతం సమకూరుస్తున్నాడు. సునీల్‌కు హీరోగా తెలుగులోనే మార్కెట్ లేదంటే.. ఈ చిత్రాన్ని కన్నడలో కూడా తీయబోతుండటం ఆశ్చర్యం కలిగించే విషయమే. తనకు తానుగా హీరోగా సినిమాలు ఆపేసుకున్న సునీల్ కూడా ఏ ధైర్యంతో మళ్లీ లీడ్ రోల్‌లో సినిమా చేస్తున్నాడన్నదీ ప్రశ్నార్థకమే. మరి ‘డీటీఎస్’ అతడికెలాంటి ఫలితాన్నిస్తుందో చూడాలి.