ఏజెంట్ వినోద్‌గా నంద‌మూరి హీరో

నంద‌మూరి క‌ళ్యాణ్ రామ్ వెండితెర‌పై క‌నిపించి ఏడాది దాటిపోయింది. గ‌త ఏడాది సంక్రాంతికి ఎంత మంచివాడ‌వురా సినిమాతో ప‌ల‌క‌రించాడ‌త‌ను. కొన్నేళ్ల ప‌రాజ‌య ప‌రంప‌ర‌కు తెర‌దించుతూ 118తో మ‌ళ్లీ ఫామ్ అందుకున్న అత‌డికి ఎంత మంచివాడ‌వురా పెద్ద షాకే ఇచ్చింది. కెరీర్లో మ‌రో పెద్ద డిజాస్ట‌ర్‌గా నిలిచింది. పండుగ టైంలో రిలీజైన ఈ ఫ్యామిలీ ఎంట‌ర్టైన‌ర్ క‌నీస స్థాయిలో ఓపెనింగ్స్ రాబ‌ట్టుకోక‌పోవ‌డం పెద్ద షాక్. ఆ షాక్ నుంచి కోలుకుని ఇంకో సినిమాను ప‌ట్టాలెక్కించ‌డానికి చాలా స‌మ‌యం తీసుకుంటున్నాడు క‌ళ్యాణ్ రామ్.

మ‌ధ్య‌లో అత‌ను హీరోగా కొత్త సినిమా గురించి ర‌క‌ర‌కాల ప్ర‌చారాలు జ‌రిగాయి. చివ‌ర‌గా మ‌ల‌యాళ థ్రిల్ల‌ర్ అంజామ్ ప‌త్తిర రీమేక్‌లో నంద‌మూరి హీరో న‌టించ‌బోతున్నాడ‌ని గట్టి ప్ర‌చార‌మే సాగింది. కానీ దాని సంగ‌తి ఏమైందో తెలియ‌దు. ఐతే ఇప్పుడు క‌ళ్యాణ్ రామ్ హీరోగా కొత్త సినిమా క‌బురు బ‌య‌టికొచ్చింది.

ఏజెంట్ వినోద్ అనే వింటేజ్ ట‌చ్ ఉన్న థ్రిల్ల‌ర్ మూవీలో క‌ళ్యాణ్ రామ్ న‌టించ‌బోతున్నాడ‌న్న‌ది తాజా స‌మాచారం. ఇందులో నంద‌మూరి హీరో డిటెక్టివ్ పాత్ర‌ను పోషించ‌బోతున్నాడ‌ట‌. ఇంత‌కుముందు అవ‌స‌రాల శ్రీనివాస్ హీరోగా బాబు బాగా బిజీ అనే అడ‌ల్డ్ కామెడీని డైరెక్ట్ చేసిన న‌వీన్ మేడారం ఈ చిత్రాన్ని రూపొందించ‌నున్నాడ‌ట‌.

తొలి సినిమా రీమేక్ కావ‌డం, అది ఫ్లాప్ కావ‌డంతో న‌వీన్ ప్ర‌తిభేంటో ఎవ‌రికీ తెలియలేదు. ఐతే అత‌ను అదిరిపోయే థ్రిల్ల‌ర్ క‌థ‌తో క‌ళ్యాణ్ రామ్‌ను ఇంప్రెస్ చేసిన‌ట్లు చెబుతున్నారు. ఈ చిత్రాన్ని అత‌ను సొంత బేన‌ర్లోనే నిర్మించ‌బోతున్న‌ట్లు కూడా చెబుతున్నారు. 1940 నేప‌థ్యంలో ఈ క‌థ న‌డుస్తుంద‌ట‌. పెద్ద బ‌డ్జెట్లోనే సినిమా తీయ‌బోతున్నార‌ట‌. క‌ళ్యాణ్ రామ్ స‌రికొత్త గెట‌ప్‌లో క‌నిపిస్తాడ‌ట‌. త్వ‌ర‌లోనే ఈ ప్రాజెక్టు గురించి అధికారిక ప్ర‌క‌ట‌న రావ‌చ్చ‌ని స‌మాచారం.