అల్లు అరవింద్ హీరో… జయసుధ హీరోయిన్

ఎన్టీఆర్, ఏఎన్నార్, కృష్ణ, శోభన్ బాబు, కృష్ణంరాజు, చిరంజీవి.. ఇలా ఎంతోమంది అగ్ర కథానాయకులకు జోడీగా ఎన్నో సినిమాలు చేశారు లెజెండరీ నటి జయసుధ. అలాంటి నటి ఇప్పుడు సీనియర్ నిర్మాత అల్లు అరవింద్‌కు జోడీగా నటించాలని ఆశపడుతుండడం విశేషం. ఈ విషయాన్ని ఒక స్టేజ్ మీద చెప్పి అందరినీ ఆశ్చర్యపరిచారు సహజ నటి.

జయసుధ తాజాగా ‘సమ్మర్ హాలిడేస్’ సినిమాలో కీలక పాత్ర పోషించారు. ఈ సినిమా ప్రి రిలీజ్ ఈవెంట్‌కు జయసుధ హాజరు కాగా.. అల్లు అరవింద్ అతిథిగా వచ్చారు. ఈ సందర్భంగా అరవింద్‌ను ఉద్దేశించి జయసుధ ఆసక్తికర వ్యాఖ్యలు చేశారు.

అరవింద్ నిర్మాతగా ఫేమస్ అయ్యారు కానీ.. ఆయన సూపర్ యాక్టర్ అనే సంగతి ఈ తరానికి తెలియదని, ఆయన చాలా బాగా నటిస్తారని జయసుధ అన్నారు. ఆయనతో కలిసి సినిమా చేయాలని ఎప్పుడో చెప్పానని, కుదరలేదని.. కానీ ఇప్పుడు చేద్దామని అరవింద్‌ను ఉద్దేశించి చెప్పారు. ఈ సినిమాకు ‘రోమన్ హాలిడే’ అనే టైటిల్ పెడితే బాగుంటుందని కూడా జయసుధ అన్నారు. ఈ మాటకు అరవింద్ నవ్వుతూ, సరే అన్నట్లు తల ఊపారు.

అరవింద్‌కు సన్నిహితుడైన యువ నిర్మాత ధీరజ్ మొగిలినేని ‘సమ్మర్ హాలిడేస్’ సినిమాను నిర్మించాడు. శ్రీకర్ నయన్ ఈ చిత్రంతో దర్శకుడిగా పరిచయం అవుతున్నాడు. ‘నైంటీస్ మిడిల్ క్లాస్’తో ఫేమస్ అయిన కుర్రాడు రోహన్.. ‘35: చిన్న కథ కాదు’ చిత్రంతో మంచి పేరు సంపాదించిన అరుణ్ దేవ్ ఇందులో ముఖ్య పాత్రలు పోషించారు. ఇందులో జయసుధ.. అరుణ్ దేవ్ అమ్మమ్మ పాత్ర చేసింది. ఈ చిత్రం దీపావళి కానుకగా ఈ శుక్రవారం ప్రేక్షకుల ముందుకు రాబోతోంది.