రాజమౌళి సంకల్పం చాలా పెద్దది

ఫిలిం నగర్ వర్గాల్లోనే కాదు సగటు ప్రేక్షకుల్లోనూ తలెత్తుతున్న ప్రశ్న ఒకటే. వారణాసి వాయిదా గురించి తిరుగుతున్న పుకార్లు నిజమా కాదాని. టీమ్ చెబుతున్న దాని ప్రకారం అందులో వీసమెత్తు నిజం లేదు. ఎందుకంటే ఏప్రిల్ 7 విడుదలకు అనుగుణంగానే అంతర్జాతీయ స్థాయిలో ప్లానింగ్ జరిగిపోయింది. తగినన్ని ఐమాక్స్ స్క్రీన్లు దొరికేలా రాజమౌళి బృందం పక్కా ప్రణాళికతో ముందుకు వెళ్తోంది. విఎఫ్ఎక్స్ కు ముందే షూటింగ్ భాగాన్ని దాదాపుగా పూర్తి చేశారు జక్కన్న. సో టెన్షన్ లేదు.

అయితే రాజమౌళి సైతం సమాధానం చెప్పలేని ప్రశ్న ఒకటుంది. ఆరు నూరైనా భూమి బద్దలైనా మాట తప్పగలరా అంటే ఔనని ఆన్సర్ ఇవ్వలేరు. ఎందుకంటే ఇవాళ ఉన్న పరిస్థితులు ఇలాగే ఉంటాయన్న గ్యారెంటీ లేదు. ఆర్ఆర్ఆర్ టైంలోనూ తక్కువ టైంలో రిలీజ్ చేయాలని టార్గెట్ పెట్టుకున్నారు. కానీ కరోనా మహమ్మారి దెబ్బకు రెండేళ్లకు పైగా విలువైన సమయం వృథా అయ్యింది. వారణాసికి అంత తీవ్రమైన సమస్య రాదు వేరే ఇబ్బందులను ఇప్పుడే ప్రెడిక్ట్ చేయలేం.

ఇంటర్నేషనల్ డిస్ట్రిబ్యూషన్, వివిధ భాషల్లో ప్రమోషన్స్, థియేటర్ బిజినెస్, అగ్రిమెంట్లు, ఓటిటి డీల్స్, పబ్లిసిటీ ప్లాన్స్, హీరో మహేష్ బాబుతో సహా టీమ్ ని వివిధ దేశాలు తిప్పే మార్కెటింగ్ అస్త్రాలు ఇలా ఎన్నో రాజమౌళి మెదడులో నిక్షిప్తమై ఉంటాయి. ఇవన్నీ సాఫీగా ఎలాంటి అడ్డంకులు లేకుండా జరుగుతాయనే గ్యారెంటీ లేదు. జక్కన్న మటుకు ఏప్రిల్ 7 లక్ష్యంగా పెట్టుకుని అన్ని రెడీ చేసుకుంటున్నారు. వారణాసి తన డేట్ కి కట్టుబడితే ఫౌజీ మార్చి మొదటి వారంలోనే రావాల్సి ఉంటుంది.

ఇంకో నాలుగైదు నెలల వరకు ఈ తరహా డిస్కషన్లు జరుగుతూనే ఉంటాయి. రాజమౌళి ఇప్పటికీ ఇతర దేశాల్లో ఆర్ఆర్ఆర్ ప్రీమియర్లు హాజరు కావడానికి కారణం ఒకటే. వారణాసిని మరింత పెద్ద స్థాయికి తీసుకెళ్లాలి అంటే తన బ్లాక్ బస్టర్స్ ని ఫారినర్స్ కి పదే పదే పరిచయం చేయాలి. ప్రీమియర్లు వేయించాలి. ఇదేదో సరదాకి చేస్తున్నది కాదు. ఆయన ప్రతి చేతల వెనుక వారణాసిని ముందుకు తీసుకెళ్లే బృహత్తర సంకల్పం ఉంది. అది అర్థంచేసుకోవడం అంత ఈజీ కాదు.