డబ్బింగ్ సినిమాల రేట్ల పెంపు సబబేనా

అక్టోబర్ 15 విడుదల కాబోతున్న జైలర్ 2 మొదటి రోజు చెన్నై టికెట్ ధర కంటే ఆంధ్రప్రదేశ్ లోని ఒక జిల్లా కేంద్రం మల్టీప్లెక్సులో ఎక్కువంటే నమ్మడానికి ఆశ్చర్యంగా ఉన్నా ఇది నిజం. ఎందుకంటే నిర్మాత అడగ్గానే పెంపుకు అనుమతులు వచ్చేశాయి కాబట్టి. అది కూడా ఒక్కో టికెట్ మీద 50, 75 రూపాయలు ఇవ్వడంతో ప్రేక్షకుల మీద వారం రోజుల పాటు అదనపు భారం పడనుంది. అసలే స్కూళ్ళు కాలేజీలకు సెలవు రోజులు. ఆక్యుపెన్సీలు బాగా ఉండే మంచి సీజన్ ఇది.

సరిగ్గా ఈ పాయింట్ మీద సోషల్ మీడియాలో విమర్శలు కామెంట్లు వచ్చి పడుతున్నాయి. జైలర్ 2 తమిళ సినిమా. దాని టార్గెట్ కూడా ప్రాధమికంగా కోలీవుడ్ ఆడియన్స్ ఆ తర్వాతే మనం. అలాంటప్పుడు స్వంత రాష్ట్రంలో లేని హైక్ మనకు మాత్రమే ఎందుకు ఇస్తున్నారనేది మూవీ లవర్స్ ప్రశ్న. ఆర్ఆర్ఆర్, పుష్ప, ప్యారడైజ్ మొదలైనవి మన సినిమాలు కాబట్టి బడ్జెట్ రికవరీ కోసం పెంపులు ఇచ్చినా అర్థం ఉంది. మరి జైలర్ 2 లాంటి వాటికి ఎందుకనేది అర్థం కాని ప్రశ్న.

అడగటం ఆలస్యం ఏపీ సర్కార్ వెంటనే పర్మిషన్లు ఇస్తోంది. టికెట్ రేట్ల పెంపుకి ఓకే అంటే చాలు ఇండస్ట్రీకి గొప్ప మేలు చేసినట్టు ఎవరైనా రాంగ్ ఫీడింగ్ ఇస్తున్నారేమో తెలియదు కానీ కింది స్థాయి జనంలో మాత్రం వ్యతిరేకత ఎదురవుతోంది. భారీ రేట్లకు హక్కులు కొనడం ఎందుకు, దాన్ని తిరిగి పబ్లిక్ మీదకు రుద్దడం ఎందుకనేది సగటు సినీ ప్రియుల నుంచి వస్తున్న క్వశ్చన్. బలవంతంగా చూడమని మేము చెప్పలేదని నిర్మాత అంటే, హక్కులు కొనకపోతే మేం ధర్నా చేస్తామనలేదని ప్రేక్షకులూ కౌంటర్ ఇస్తారు.

ఒకవైపు రణబాలి లాంటి స్ట్రెయిట్ టాలీవుడ్ ప్యాన్ ఇండియా మూవీ పెంపుకి వెళ్లకుండా మేలు చేస్తుంటే, అనువాదం చేసిన జైలర్ 2 మాత్రం నాకు ఎక్కువ కలెక్షన్లు కావాలనే రీతిలో ఇలా అవకాశాన్ని వాడుకోవడం సమర్ధనీయం కాదు. ఇది మొదటిసారి కాదు. గతంలో కెజిఎఫ్, కాంతార, కూలి, టాక్సిక్ మొదలైనవాటికి హైక్స్ ఇచ్చారు. కొన్ని లాభపడ్డాయి, కొన్ని నష్టపోయాయి. అయినా సరే ఛాన్స్ ఉంది కదాని ఇలా ప్రతిసారి అడగడం సబబేనానేది ఎవరికి వారు ప్రశ్నించుకోవాలి తప్పించి ఎవరేం చేయలేరు.