ఒడిస్సి జోరు ఎక్కడి దాకా వచ్చింది

హాలీవుడ్ మూవీ ది ఒడిస్సి ఇండియాలో వంద కోట్ల మార్కు అందుకోవడం చిన్న రికార్డు కాదు. సూపర్ హీరోస్, ప్రమాదకర జంతువులు, ఫాంటసీ ఎలిమెంట్స్ ఏవీ లేని ఒక సర్వైవల్ డ్రామా ఇంత మొత్తం రాబట్టడం గురించి కొన్ని సంవత్సరాలు మాట్లాడుకుంటారు. ముఖ్యంగా విఎఫెక్స్ వాడకం పరిమితంగా ఉన్న ఈ మూవీలో డ్రామా ఎంత ఉన్నప్పటికీ గూస్ బంప్స్ ఇచ్చే అంశాలు తక్కువే. అయినా సరే ఇంత గొప్ప విజయం సాధించడం దర్శకుడు క్రిస్టఫర్ నోలన్ కే సాధ్యం.

వీక్ డేస్ లోనూ ఒడిస్సి రన్ డీసెంట్ గా ఉంది. ఆక్యుపెన్సీలు మరీ దారుణంగా పడిపోకపోవడం శుభ సూచకం. ఇంగ్లీష్ వెర్షన్ బాగా ఆడుతున్న నగరాల్లో కొచ్చి తర్వాత హైదరాబాద్ రెండో స్థానంలో ఉండటం గమనార్హం. బుధవారం దేశవ్యాప్తంగా 8268 షోలు వేయగా డబ్బింగ్ చేయని ఒరిజినల్ వెర్షన్ ఒక్కటే 60 శాతం ఆక్యుపెన్సీ నమోదు చేయడం విశేషం. నైట్ షోలలో 70 శాతానికి పైగానే క్రౌడ్స్ కనిపిస్తున్నాయి. అహ్మదాబాద్ లో తక్కువ స్పందన ఉంది.

థియేటర్ రన్ అయ్యేలోపు 150 కోట్లు దాటాలని చూస్తున్న నిర్మాతలకు జూలై 30 స్పైడర్ మ్యాన్ బ్రాండ్ న్యూ డే రూపంలో పెద్ద అడ్డంకి రానుంది. దాని ప్రభావం తీవ్రంగానే ఉంటుందని, ముఖ్యంగా చిన్నపిల్లలు, కుటుంబాలు దాని వైపు ఎక్కువ మొగ్గు చూపిస్తారు కాబట్టి ఒడిస్సి ఫైనల్ రన్ కు వచ్చేస్తుందని అంచనా వేస్తున్నారు. అలా జరిగే పక్షంలో రాబోయే వీకెండ్ నోలన్ మూవీకి అంతగా వర్కౌట్ కాదు. ఏపీ తెలంగాణ రెండో వారంలో కూడా తగినన్ని స్క్రీన్లు ఒడిస్సికి కేటాయించారు.

బాలీవుడ్ లో ఢమాల్ 4 తప్ప చెప్పుకోదగ్గ సినిమా లేదు. ఈ వారం విజయ్ జన నేత తప్ప వేరే ఆప్షన్లు అంతగా కనిపించడం లేదు. ఉత్తరాది మార్కెట్లలో ఒడిస్సికి ఈ అంశం బాగా కలిసి వస్తోంది. పాజిటివ్ నెగటివ్ రెండు రకాల టాక్స్ మిశ్రమంగా తెచ్చుకున్నప్పటికీ ఈ స్థాయిలో ఒడిస్సి వసూళ్లు రాబట్టడం ట్రేడ్ ని ఆశ్చర్యానికి గురి చేసింది. ఇప్పటిదాకా కంటెంట్ సినిమాలు తీస్తూ వచ్చిన క్రిస్టఫర్ నోలన్ నెక్స్ట్ ఒక హారర్ మూవీ తీయొచ్చని వినిపిస్తోంది. కథ ఇంకా రాసుకోవాలట.