అంతలా నోరు జారకూడదు రష్మికా…

స్టేజ్ మీద ఎక్కితే.. మైక్ అందుకుంటే చాలు ఫిలిం సెలబ్రెటీల్లో చాలామంది అదుపు తప్పేస్తుంటారు. తాము ఏం మాట్లాడుతున్నామో తెలియని స్థితికి వెళ్లిపోతుంటారు. జనాలను చూసిన ఉత్సాహమో.. తమతో స్టేజ్ పంచుకుంటున్న వాళ్లను చూసినపుడు వచ్చే ఉద్వేగమో కానీ.. నోటికొచ్చింది మాట్లాడేసి చిక్కుల్లో పడుతుంటారు. ఈ సోషల్ మీడియా కాలంలో చిన్న పదం తప్పు దొర్లినా.. ట్రోల్స్ తప్పవు. ఇమేజ్ డ్యామేజ్ అయిపోతుంది.

సినీ ప్రముఖులు చాలామందికి ఇది అనుభవమే. ఇప్పుడీ జాబితాలోకి రష్మిక మందన్నా కూడా చేరింది. హిందీలో తాను కీలక పాత్ర పోషించిన ‘కాక్ టైల్-2’ సినిమా ప్రమోషన్లలో భాగంగా టీంతో కలిసి ఒక ఈవెంట్లో పాల్గొన్న రష్మిక.. నోరు జారి సోషల్ మీడియాకు టార్గెట్ అయింది.

తన సహ నటి కృతి సనన్ గురించి మాట్లాడే క్రమంలో ముందుగా ఆమె చాలా హాట్‌గా ఉంటుందని చెప్పింది. అంతటితో ఆగకుండా.. ‘ఫ..గ్ హాట్’ అంటూ ఇంగ్లిష్ వాళ్ల స్టయిల్లో ఇంకో పద ప్రయోగం చేసింది. ఇంగ్లిష్ సినిమాల్లో ఈ మాటను చాలా మామూలుగా వాడేస్తుంటారు కానీ.. మన దగ్గర మాత్రం ఆ మాటను జనాలు సీరియస్‌గా తీసుకుంటారు.

రష్మిక వెస్ట్రన్ ఇన్ఫ్లుయెన్స్‌తో ఈ మాట వాడేయడంతో స్టేజ్ మీద ఉన్న వాళ్లందరూ షాకైపోయారు. కృతితో పాటు హీరో షాహిద్ కపూర్ కూడా అంత మాట అనేశావేంటి అంటూ పగలబడి నవ్వారు. తాను అదుపు తప్పి మాట్లాడానని రష్మిక కొంచెం లేటుగా గ్రహించి, ఈ మాటను పరిహరించండి అన్నట్లుగా మీడియా వాళ్లకు సిగ్నల్ ఇచ్చింది.

కానీ ఈ వీడియో సోషల్ మీడియాలో బాగా వైరల్ అయిపోయి.. ఆల్రెడీ రష్మిక మీద ట్రోలింగ్ మొదలైపోయింది. ఈ అనుభవం తర్వాత అయినా ఫిలిం సెలబ్రెటీలు స్టేజ్ మీద మాట్లాడేటపుడు కొంచెం అప్రమత్తంగా ఉంటారేమో చూడాలి.