కొరటాల మాస్… బాలయ్య కార్పెంటర్

నందమూరి బాలకృష్ణ, దర్శకుడు కొరటాల శివ కలయికలో తెరకెక్కబోతున్న సినిమా త్వరలోనే సెట్స్ పైకి వెళ్లనుంది. విశ్వసనీయ సమాచారం మేరకు మే 21 ఓపెనింగ్ చేయబోతున్నారు. అనిరుధ్ రవిచందర్ మొదటిసారి బాలయ్యకు సంగీతం సమకూర్చడం విశేషం. దేవర రూపంలో అద్భుతమైన అవుట్ ఫుట్ ఇచ్చిన తన వైపే కొరటాల మొగ్గు చూపడంతో రెమ్యునరేషన్ అధికమైనా సరే ఓకే అనుకున్నారట. అసలు విశేషం ఇంతకన్నా పెద్దదే ఉంది.

ఇన్ సైడ్ ప్రకారం ఈ సినిమాకు ‘కార్పెంటర్’ అనే పేరు బలమైన పరిశీలనలో ఉన్నట్టు తెలిసింది. ఈ మధ్య స్టార్ హీరోలు అయితే కోటీశ్వరులు గానో లేదా పెద్ద ఉద్యోగం చేస్తున్న క్యారెక్టర్లే ఎక్కువగా చేస్తున్నారు. కార్పెంటర్ అనేది మన నిత్య జీవితంలో ఎంతగానో ముడిపడిన పేరు. ఏదో ఒక సందర్భంలో వీళ్ళతో పని పడుతూనే ఉంటుంది. పైగా మాస్ కి త్వరగా రీచ్ అవుతుంది. కథ ప్రకారం బాలయ్య వృత్తి అదే కావడంతో దీన్నే లాక్ చేసే ఆలోచనలో ఉన్నారట.

ఇంతకు మించి లీక్స్ రాలేదు కానీ ఇక్కడో ఆసక్తికరమైన విషయం ఉంది. ఆచార్యలో చిరంజీవి ప్రొఫెషన్ కూడా కార్పెంటరే. పాదఘట్టంకు వచ్చినప్పుడు అక్కడి జనాలకు అలాగే పరిచయమవుతాడు. ఇప్పుడు కొరటాల అదే వృత్తిని బాలయ్యకు పెట్టడం చూస్తుంటే దెబ్బ పడిన చోటే మళ్ళీ ఋజువు చేసుకోవాలనే తపన అనుకోవచ్చు. జూనియర్ ఎన్టీఆర్ కు బ్లాక్ బస్టర్ ఇచ్చిన కొరటాల ఇప్పుడు బాలయ్యకు అంతకన్నా పెద్ద హిట్టు ఇవ్వాలి.

గోపీచంద్ మలినేని ప్రాజెక్టుతో పాటు ఈ సినిమా షూటింగ్ కూడా సమాంతరంగా జరుగుతుందని వినికిడి. విడుదల విషయంలో ఇంకా ఎలాంటి నిర్ణయం తీసుకోలేదు. వీటిలో ఒకటి 2027 సంక్రాంతికి ఉండాలనేది టార్గెట్ గా పెట్టుకున్నారట. అఖండ తాండవం 2 డిసెంబర్ లో వచ్చిన నేపథ్యంలో ఈసారి పండగ మిస్ కాకుండా వీలైనంత ట్రై చేస్తారట. ఒకవేళ అనుకున్న టైంకి అన్నీ పూర్తయితే మలినేని తీస్తున్న బాలయ్య 111 దసరా బరిలో ఉండే అవకాశాలు ఎక్కువని చెప్పొచ్చు.