ఛాన్స్ పోగొట్టిన లవ్ ఇన్సూరెన్స్

ప్రదీప్ రంగనాథన్ కొత్త మూవీ లవ్ ఇన్సూరెన్స్ కంపెనీ ఎన్నో వాయిదాల తర్వాత ఎట్టకేలకు థియేటర్లలో అడుగు పెట్టేసింది. ఉదయం చాలా చోట్ల కెడిఎం ఇష్యూ రావడంతో షోలు పడలేదు కానీ తర్వాత సాల్వ్ అయిపోయింది. బుకింగ్స్ ఓ మోస్తరుగా పర్వాలేదనిపించేలా జరిగాయి కానీ డ్రాగన్, డ్యూడ్ తో పోలిస్తే వాటికి వచ్చిన క్రేజ్ స్థాయిలో ఈ ఎల్ఐకె లేదనేది స్పష్టం. అందులోనూ డెకాయిట్ రూపంలో పెద్ద కాంపిటీషన్ ఉండటం ఓపెనింగ్స్ మీద ప్రభావం చూపించింది.

ఇక టాక్ విషయానికి వస్తే లవ్ ఇన్సూరెన్స్ కంపెనీకి యునానిమస్ టాక్ రాలేదు. సోషల్ మీడియా, పబ్లిక్ టాక్స్, రివ్యూస్ గమనిస్తే నెగటివ్ నుంచి యావరేజ్ కు మధ్యలో కనిపిస్తున్నాయి. 2040 సంవత్సరాన్ని బ్యాక్ డ్రాప్ గా తీసుకుని యూత్ ఫుల్ గా ఏదో చెప్పాలని ట్రై చేసిన దర్శకుడు విగ్నేష్ శివన్ టెక్నాలజీ, ప్రేమకు ముడిపెడుతూ డిఫరెంట్ గా రాసుకున్నాడు కానీ దాన్ని అంతే ప్రతిభావంతంగా తీర్చిదిద్దలేకపోయాడు. ముఖ్యంగా సెకండాఫ్ మీద కంప్లైంట్స్ ఎక్కువున్నాయి.

క్రమంగా ప్రదీప్ రంగనాథన్ లవ్ స్టోరీస్ పేరుతో రెగ్యులర్ మూసలోకి వెళ్తున్నట్టు కనిపిస్తోంది. పదే పదే ఒకే తరహా పాత్రలు చేయడం వల్ల రెగ్యులర్ ఫ్యామిలీ ఆడియన్స్ కి దూరమయ్యే ప్రమాదం ఉంది. పైగా లవ్ ఇన్సూరెన్స్ కంపెనీలో యూత్ ఎలిమెంట్స్ ఉన్నప్పటికీ అవి సరైన మోతాదులో బ్యాలన్స్ కాకపోవడంతో అధిక శాతం సినిమా బోర్ కొట్టేసేలా సాగింది. వీకెండ్ వరకు పెర్ఫార్మన్స్ ఎలా ఉంటుందనే దాని మీద ట్రేడ్ వర్గాల్లో అనుమానాలు లేకపోలేదు.

ఒకవేళ ఈ మిక్స్డ్ టాక్ తట్టుకుని తమిళం లేదా తెలుగులో లవ్ ఇన్సూరెన్స్ కంపెనీ ఓకే హిట్ అనిపించుకున్న చాలు ప్రదీప్ రంగనాథన్ ఇమేజ్ దానికి కారణంగా నిలుస్తుంది. కాకపోతే అక్కడేమో ఎన్నికల వేడిలో జనాలు థియేటర్ల వైపు అంతగా ఆసక్తి చూపించడం లేదు. మన దగ్గరేమో బజ్ చాలా తక్కువగా ఉంది. డ్యూడ్, డ్రాగన్ హిట్ల ప్రభావం దీని మీద అంతగా కనిపించడం లేదు. చూస్తుంటే ప్రదీప్ రంగనాథన్ జోరుకి బ్రేక్ పడినట్టే కనిపిస్తోంది.