ష‌కీలా సినిమా.. మేం చూడం

ఒక‌ప్పుడు మ‌ల‌యాళంలో సాఫ్ట్ పోర్న్ సినిమాల‌తో యువ‌త‌ను ఉర్రూత‌లూగించడంతో పాటు అక్క‌డి సినీ ప‌రిశ్ర‌మ‌లో క‌ల‌వ‌రం రేపిన శృంగార తార ష‌కీలా జీవిత క‌థ ఆధారంగా ఆమె పేరుతోనే ఓ సినిమా తెర‌కెక్క‌డం తెలిసిన సంగ‌తే. ఇందులో ష‌కీలా పాత్ర‌ను బాలీవుడ్ భామ రిచా చ‌ద్దా పోషించింది. ఇంద్ర‌జిత్ లంకేష్ ద‌ర్శ‌క‌త్వంలో తెర‌కెక్కిన‌ ఈ చిత్రాన్ని శుక్ర‌వారం క్రిస్మ‌స్ కానుక‌గా విడుద‌ల చేశారు.

హిందీ, త‌మిళం, మ‌ల‌యాళం, క‌న్న‌డ భాష‌ల్లో ఒకేసారి ఈ సినిమా రిలీజ‌వ‌డం విశేషం. ఐతే వ్య‌క్తిగ‌త జీవితంలోనూ ఎన్నో మ‌లుపులున్న‌ ఒక‌ప్ప‌టి సంచ‌ల‌న‌ శృంగార తార క‌థ‌.. రిచా చద్దా లాంటి మంచి న‌టి ప్ర‌ధాన పాత్ర పోషించిన నేప‌థ్యంలో ఈ సినిమాపై ప్రేక్ష‌కుల్లో బాగానే ఆస‌క్తి ఉంటుంద‌ని అంచ‌నా వేశారు బాక్సాఫీస్ పండిట్లు. కానీ తొలి రోజు ష‌కీలా సినిమాకు క‌నీస స్పంద‌న క‌ర‌వైంది.

దేశ‌వ్యాప్తంగా ఏ రాష్ట్రంలోనూ ష‌కీలా సినిమాను జ‌నాలు ప‌ట్టించుకోవ‌ట్లేద‌ట‌. జ‌నాలు లేక చాలా చోట్ల షోలు క్యాన్సిల్ చేసిన‌ట్లు బాలీవుడ్ ట్రేడ్ పండిట్ ఒక‌రు ట్వీట్ చేశారు. తొలి రోజు ఈ సినిమా రూ.25 ల‌క్ష‌ల గ్రాస్ క‌లెక్ట్ చేయ‌డం కూడా క‌ష్ట‌మే అని తేల్చేశాడంటే. ఈ సినిమా ప‌రిస్థితేంటో అర్థం చేసుకోవ‌చ్చు. ఈ సినిమా ట్రైల‌ర్ చూస్తేనే అన్నీ ఎగ్జాజ‌రేష‌న్ల‌లా క‌నిపించాయి.

ఈ సినిమాకు వ‌చ్చిన స్పంద‌న చూస్తుంటే ష‌కీలా ప‌ట్ల కానీ.. ఆమె వ్య‌క్తిగ‌త జీవితం గురించి కానీ ఇప్ప‌టి ప్రేక్ష‌కుల‌కు ఏమాత్రం ఆస‌క్తి లేద‌న‌డానికి రుజువులా క‌నిపిస్తోంది. ష‌కీలా సాఫ్ట్ పోర్న్ సినిమాల నుంచి నిష్క్ర‌మించే స‌మ‌యంలో ఈ సినిమా తీసి ఉంటే ఫ‌లితం బాగుండేదేమో. ఇప్పుడు ఆమె పూర్తిగా లైమ్ లైట్ నుంచి వెళ్లిపోయింది. మ‌ల‌యాళంలో సాఫ్ట్ పోర్న్ సినిమాల జాడే లేదిప్పుడు. ప‌దేళ్ల కింద‌టే వాటికి తెర‌ప‌డింది. ఈ నేప‌థ్యంలోనే ఈ సినిమాను జ‌నాలు ప‌ట్టించుకుంటున్న‌ట్లు లేరు.