షకీలా సినిమా.. ఇష్టమొచ్చినట్లు

ఒకప్పుడు మలయాళ ఫిలిం ఇండస్ట్రీని షేక్ చేసిన శృంగార తార షకీలా జీవిత కథ ఆధారంగా ‘షకీలా’ పేరుతో ఓ బహు భాషా చిత్రం తెరకెక్కిన సంగతి తెలిసిందే. ఈ నెల 25న క్రిస్మస్ కానుకగా ఈ చిత్రాన్ని థియేటర్లలో విడుదల చేయబోతున్నారు. ఇంతకుముందు రిలీజ్ చేసిన టీజర్ బాగానే చర్చనీయాంశం అయింది. ఇప్పుడు ట్రైలర్ కూడా వదిలారు. షకీలా జీవితంలో వాస్తవంగా ఏం జరిగిందో ఏమో కానీ.. ఈ సినిమాలో మాత్రం డ్రామాకు లోటు లేనట్లే కనిపిస్తోంది.

80ల్లో దక్షిణాది సినిమాల్లో శృంగార రసాన్ని ఒక రేంజిలో పండించిన సిల్క్ స్మిత హఠాన్మరణంతో ఏర్పడిన ఖాళీని పూరించడానికి.. షకీలా వచ్చినట్లుగా ఇందులో చూపించారు. చిన్న వయసులోనే తండ్రి మరణం, ఆర్థిక ఇబ్బందుల నేపథ్యంలో తప్పనిసరి పరిస్థితుల్లో షకీలా సినిమాల్లోకి వచ్చి ముందుగా రొమాంటిక్ సినిమాల్లో నటించినట్లు.. ఆ తర్వాత సాఫ్ట్ పోర్న్ సినిమాల్లోకి అడుగు పెట్టినట్లు ప్రొజెక్ట్ చేశారు.

ఇక్కడి వరకు బాగానే ఉంది కానీ.. షకీలా నటించిన సాఫ్ట్ పోర్న్ సినిమాల గురించి ట్రైలర్లో చూపించిన దృశ్యాలు మాత్రం ఆశ్చర్యం కలిగించేవే. ముఖం మాత్రమే నీది, బాడీ వేరే వాళ్లది అంటూ.. సాఫ్ట్ పోర్న్ సినిమాల్లో షకీలా అసలు శృంగార సన్నివేశాలే చేయలేదు అన్నట్లుగా ప్రొజెక్ట్ చేసే ప్రయత్నం జరిగినట్లుగా ఉంది. అలాగే పంకజ్ త్రిపాఠి పోషించిన పాత్రను మమ్ముట్టికి అనుకరణగా భావించారు కానీ.. ట్రైలర్లో చూపించిన దృశ్యాలు చూస్తే అది పూర్తిగా కల్పితం అనిపిస్తోంది.

ఇంకా ట్రైలర్లో చూపించిన అనేక సన్నివేశాలు, షాట్లు గమనిస్తే షకీలా జీవితంలోని విషయాలను.. ఆమె స్థాయిని బాగా ఎగ్జాజరేట్ చేసి చూపించే ప్రయత్నం జరిగినట్లే ఉంది. బాలీవుడ్ నిర్మాతలు ప్రొడ్యూస్ చేసిన ఈ చిత్రాన్ని ఇంద్రజిత్ లంకేష్ రూపొందించాడు. షకీలా పాత్రను రిచా చద్దా పోషించిన ఈ సినిమా క్రిస్మస్ సీజన్లో థియేటర్లలో ఏమేర సందడి చేస్తుందో చూడాలి.