అఖండ-2 రికార్డులు.. ఇటు ఆనందం, అటు బాధ

నందమూరి బాలకృష్ణ కెరీర్లోనే అత్యధిక అంచనాలతో వచ్చిన సినిమాల్లో ‘అఖండ-2’ ఒకటి. ఎవ్వరూ ఊహించిన స్థాయిలో బ్లాక్ బస్టర్ అయిన ‘అఖండ’కు సీక్వెల్ కావడంతో దీనిపై భారీ అంచనాలు నెలకొన్నాయి. కానీ ఆ అంచనాలను సినిమా అందుకోలేకపోయింది. ఈ నెల 12న డివైడ్ టాక్‌తో మొదలైన ‘అఖండ-2’ వీకెండ్ వరకు మంచి వసూళ్లే రాబట్టినా.. తర్వాత కలెక్షన్లు ఒక్కసారిగా డౌన్ అయ్యాయి.

అంతటితో సినిమా కథ ముగిసిందని అనుకున్నారు. కానీ తర్వాత కూడా తర్వాతి రెండు వీకెండ్లలోనూ సినిమా చెప్పుకోదగ్గ వసూళ్లే రాబట్టింది. సెకండ్ వీకెండ్లో తెలుగులో చెప్పుకోదగ్గ సినిమాలు రిలీజ్ కాకపోవడం దీనికి కలిసొచ్చింది. ఇక ఈ వీకెండ్లో క్రిస్మస్ సెలవులు కలిసొచ్చాయి. దాని వల్ల ఇప్పటికీ సినిమాకు షేర్ తెచ్చుకోగలుగుతోంది.

తొలి వీకెండ్ తర్వాత ‘అఖండ-2’ కలెక్షన్లు ఒక్కసారిగా పడిపోవడం చూసి ఇది పెద్ద డిజాస్టర్ అవుతుందని అంతా అనుకున్నారు. కానీ తర్వాత మళ్లీ సినిమా పైకి లేచింది. ఎలాగోలా కష్టపడి ఈ సినిమా రూ.120 కోట్ల మేర గ్రాస్ వసూళ్లు రాబట్టింది. బాలయ్య కెరీర్లో ఇది వరుసగా అయిదో వంద కోట్ల సినిమా కావడం విశేషం.

మరోవైపు ఈ చిత్రం యుఎస్‌లో కూడా అడుగు అడుగు వేసుకుంటూ మిలియన్ మార్కును అందుకుంది. బాలయ్యకు అక్కడ ఇది వరుసగా అయిదో మిలియన్ డాలర్ మూవీ. సీనియర్ హీరోల్లో ఎవ్వరూ ఈ రెండు ఘనతలు సాధించలేదు. ఇది బాలయ్య అభిమానులకు ఆనందాన్నిచ్చే విషయమే కానీ.. ‘అఖండ-2’ బయ్యర్లకు మాత్రం పెద్దగా సంతోషం లేదు.

వరల్డ్ వైడ్ ఎక్కడా ఈ సినిమా బ్రేక్ ఈవెన్ అవ్వలేదు. నైజాంలో స్వల్ప నష్టాలతో బయటపడుతున్నారు కానీ.. మిగతా అన్ని చోట్ల నష్టాలు భారీగానే ఉన్నాయి. ఉత్తరాంధ్రలో అయితే టార్గెట్లో సగం కూడా రాబట్టలేకపోయింది. యుఎస్‌లో కూడా అదే పరిస్థితి. రూ.200 కోట్ల గ్రాస్ కలెక్ట్ చేస్తే బ్రేక్ ఈవెన్ అయ్యే సినిమా రూ.120 కోట్ల రేంజిలో ఉందంటే దీని ఫలితమేంటో వేరే చెప్పాలా?