గోపాలుడి కాన్సెప్టుతో గుజరాతీ బ్లాక్ బస్టర్

వెంకటేష్, పవన్ కళ్యాణ్ నటించిన గోపాల గోపాల గుర్తుందిగా. అందులో నాస్తికుడిగా ఉన్న వ్యక్తి కోసం సాక్ష్యాత్తు శ్రీ కృష్ణుడు భూమిపైకి వచ్చి తన మహత్తు తెలిసేలా చేస్తాడు. బాలీవుడ్ బ్లాక్ బస్టర్ ఓ మై గాడ్ గా రీమేక్ గా రూపొందిన ఈ మల్టీస్టారర్ మంచి విజయమే సాధించింది. దీని తర్వాత నిఖిల్ సిద్దార్థ్ కార్తికేయ 2లోనూ కృష్ణుడిని హైలైట్ చేసిన దర్శకుడు చందూ మొండేటి ఏకంగా నార్త్ ఆడియన్స్ తో కూడా బ్లాక్ బస్టర్ కొట్టించాడు. ఈ మధ్య ఇదో సక్సెస్ ఫార్ములాగా మారిపోతోంది. మన దగ్గరే కాదు అసలు సినిమాల మార్కెట్ చాలా తక్కువగా ఉండే గుజరాత్ లోనూ ఇది కామధేనువుగా మారింది.

అక్టోబర్ 10న అక్కడ లాలో కృష్ణ సదా సహాయతే విడుదలయ్యింది. బడ్జెట్ యాభై లక్షలలోపే. మొదటి రోజు టాక్ బాగానే వచ్చింది. వసూళ్లు పెద్దగా లేవు. క్రమంగా అది వైరస్ గా మారి ఇప్పుడు ఏకంగా వంద కోట్ల క్లబ్బులోకి అడుగు పెట్టబోతోంది. వందల కోట్లతో తీసిన ప్యాన్ ఇండియా మూవీసే పది రోజుల తర్వాత నెమ్మదిస్తున్న టైంలో ఈ గుజరాతి చిత్రం ఏకంగా రికార్డులు బద్దలు కొడుతూ ఇప్పటికీ హౌస్ ఫుల్స్ నమోదు చేయడం అనూహ్య పరిణామం. మొదటి రెండు మూడు వారాలు చాలా సెంటర్లలో టికెట్లు దొరక్క లక్షలాది ప్రేక్షకులు వెనక్కు వెళ్లిన దాఖలాలు గురించి మీడియాలో హైలైట్ చేస్తున్నారు.

అలాని ఇందులో కనివిని ఎరుగని కథేమీ లేదు. కష్టాల్లో ఉన్న ఒక ఆటో డ్రైవర్ కోసం మనిషి రూపంలో కృష్ణుడు వస్తాడు. దగ్గరుండి అతని నిరాశా నిస్పృహలను పోగొట్టి మంచి స్థాయికి చేరుకునేలా చేస్తాడు. ఎంటర్ టైన్మెంట్, ఎమోషన్, డివోషన్ అన్నీ సమపాళ్లలో మిక్స్ చేసిన దర్శకుడు అంకిత్ సఖియా దెబ్బకు స్టార్ డైరెక్టర్ అయిపోయారు. గుజరాత్ లో ఇప్పటిదాకా హయ్యెస్ట్ గ్రాసర్ రికార్డు 50 కోట్లతో చాల్ జీవి లాయియే మొదటి స్థానంలో ఉంది. దాన్ని డబుల్ మార్జిన్ తో బ్రేక్ చేసిన లాలో కృష్ణ సదా సహాయతే ఇప్పుడు సరికొత్త చరిత్ర సృష్టించింది. అన్నట్టు వివిధ బాషల నుంచి రీమేక్ హక్కుల కోసం భారీ డిమాండ్ నెలకొంది.