భాగ్యశ్రీ హృదయాన్ని మాయం చేశారు

తాజాగా విడుదలైన కింగ్డమ్ భారీ ఓపెనింగ్స్ తో మొదలయ్యింది. టాక్, రివ్యూల సంగతి పక్కనపెడితే విజయ్ దేవరకొండ బ్రాండ్ తో పాటు గౌతమ్ తిన్ననూరి ఇమేజ్, అనిరుద్ రవిచందర్ సంగీతం బాగా ప్లస్ అయ్యాయి. అయితే ఫ్యాన్స్ కి టీమ్ ఊహించని ట్విస్ట్ ఇచ్చారు. యూట్యూబ్ లో 15 మిలియన్లకు పైగా వ్యూస్ తెచ్చుకున్న హృదయం లోపల సాంగ్ ని ఎడిటింగ్ లో తీసేశారు. సెకండాఫ్ లో ఎక్కడైనా వస్తుందేమోనని అభిమానులు ఎదురు చూశారు కానీ రాలేదు. నిజానికి కథలో ఉన్న సీరియస్ నెస్ వల్ల బలవంతంగా ఇరికిస్తే ఇంకాస్త మైనస్ అయ్యేది కానీ ఒకరకంగా చెప్పాలంటే ఎడిట్ చేయడమే మంచిదయ్యింది.

తర్వాత జోడించే అవకాశాలు తక్కువే. ఇది ముందే గుర్తించి కాబోలు ఫుల్ వీడియో సాంగ్ ని రెండు నెలల క్రితమే అఫీషియల్ గా అప్లోడ్ చేశారు. అనిరుద్ కంపోజ్ చేసిన ఈ స్మూత్ మెలోడీ మ్యూజిక్ లవర్స్ ని ఆకట్టుకుంది. ఫ్లో ప్రకారం చూసుకుంటే అన్నదమ్ముల బాండింగ్ మీద ఎక్కువగా నడిచిన ఈ సినిమాలో ప్రేమకు పెద్దగా చోటు దక్కలేదు. విజయ్ దేవరకొండ, భాగ్యశ్రీ బోర్సేల మధ్య లవ్ స్టోరీకి స్కోప్ ఉన్నా గౌతమ్ తిన్ననూరి వాడుకోలేదు. ఆ మాటకొస్తే ట్రైలర్ లో చూపించిన కొన్ని షాట్లు, టీజర్ లో తగలబెట్టేస్తా అనే సీన్ మెయిన్ మూవీలో లేవు. దీనికి సమాధానం గౌతమ్, నవీన్ నూలి దగ్గరే ఉంటుంది.

ఇది కాసేపు పక్కనపెడితే మిస్టర్ బచ్చన్ తరహాలో భాగ్యశ్రీ బోర్సేకు ఎక్కువ స్కోప్ దక్కలేదు. కథా గమనం వల్ల కొంత భాగానికి మాత్రమే పరిమితం కావాల్సి వచ్చింది. కాకపోతే ఇద్దరి మధ్య షూట్ చేసిన కొన్ని సీన్లు, ప్రేమకథ కోతకు గురైనట్టు తెలిసింది. మళ్ళీ రావా, జెర్సీకి భిన్నంగా ఈసారి మాస్ సీరియస్ బ్యాక్ డ్రాప్ ఎంచుకున్న గౌతమ్ తిన్ననూరి మొదటిసారి హీరో హీరోయిన్ మధ్య కెమిస్ట్రీని ఇంత తక్కువగా చూపించింది కింగ్డమ్ లోనే. ఇంకా రెండో భాగం ఉందంటున్నారు కానీ ఫైనల్ బాక్సాఫీస్ రన్ ముగిశాక నిర్ణయం తీసుకుంటారేమో చూడాలి. ప్రస్తుతానికి బాక్సాఫీస్ జోరు బాగానే ఉంది.