ప్యారడైజ్ వెనక్కు తగ్గడం లేదు

న్యాచురల్ స్టార్ నాని కెరీర్ లోనే అత్యంత భారీ బడ్జెట్ తో రూపొందుతున్న ది ప్యారడైజ్ షూటింగ్ ఊపందుకుంది. ఆ మధ్య పలు కారణాల వల్ల చిన్న బ్రేక్ ఇచ్చినప్పటికీ దర్శకుడు శ్రీకాంత్ ఓదెల స్పీడ్ పెంచేశాడు. వచ్చే ఏడాది మార్చి 26 విడుదల తేదీ మారొచ్చనే వార్తల నేపథ్యంలో ఇవాళ లాంచ్ చేసిన విలన్ రాఘవ్ జుయల్ టీజర్ లో మరోసారి డేట్ ని స్పష్టంగా పేర్కొంటూ క్లారిటీ ఇవ్వడంతో నాని ఫ్యాన్స్ హమ్మయ్య అనుకుంటున్నారు. కేవలం ఒక రోజు గ్యాప్ తో రామ్ చరణ్ పెద్ది మార్చి 27 రానుండటంతో ఈ క్లాష్ గురించి ఇండస్ట్రీలోనే కాదు సాధారణ ప్రేక్షకుల్లోనూ ఆసక్తి నెలకొంది.

ఇంకా చాలా టైం ఉంది కాబట్టి ఆలోగా ఏమైనా జరగొచ్చనే తరహాలో ఇంకో ఆరేడు నెలలు ఆగితే కానీ ఏ విషయం నిర్ధారణగా చెప్పలేం. గత కొన్నేళ్లలో ముందు చెప్పిన తేదీకి కట్టుబడ్డ ప్యాన్ ఇండియా మూవీ ఒక్కటి కూడా టాలీవుడ్ లో లేదు. కనీసం రెండు మూడు వాయిదాలు లేనిదే నిర్మాతలు హీరోలు ముందుకెళ్లడం లేదు. కానీ ది ప్యారడైజ్ అలా కాదు. అనౌన్స్ మెంట్ వీడియోలో ముందు స్లాట్ బుక్ చేసుకుంది. ఆ తర్వాత రామ్ చరణ్ పెద్ది లైన్ లోకి వచ్చింది. ఒకవేళ పరస్పరం తలపడాల్సి వస్తే రెండూ బాగుంటే బ్లాక్ బస్టరవుతాయనే నమ్మకాన్ని హిట్ 3 ఇంటర్వ్యూలలో నాని వ్యక్తం చేయడం చూశాం.

హీరోకు ధీటుగా విలన్ పాత్రను డిజైన్ చేసిన శ్రీకాంత్ ఓదెల ఈసారి రాఘవ్ జ్యూయెల్ ని క్రూరమైన పెత్తందారీ పాత్రలో చాలా ఇంటెన్స్ గా చూపించబోతున్నాడట. కిల్ లో కిల్లర్ గా అదరగొట్టిన రాఘవ్ కు ఇది పెద్ద బ్రేక్ కానుంది. ఎందుకంటే ప్యారడైజ్ హిట్ అయితే తెలుగులో మంచి అవకాశాలు దక్కించుకోవచ్చు. ఇప్పటిదాకా టాలీవుడ్ తెరమీద రాని షాకింగ్ క్యారెక్టరైజేషన్ ని నానికి రాసుకున్న శ్రీకాంత్ ఓదెల దాన్ని తెరమీద ఎలా చూపిస్తాడనే ఎగ్జైట్ మెంట్ అభిమానుల్లో ఫుల్లుగా ఉంది. చిరంజీవితో చేయబోయే తన నెక్స్ట్ మూవీకి ఇది బలమైన పునాది వేయాలనే కసితో శ్రీకాంత్ ఓ రేంజ్ లో ప్యారడైజ్ ని తీస్తున్నాడట.