తొలి అడుగు సక్సెస్… అసలు కొండ ముందుంది

హరిహర వీరమల్లు ట్రైలర్ ఫ్యాన్స్ ని సంతృప్తి పరిచింది. పవన్ కళ్యాణ్ ని ఇంత శక్తివంతమైన పాత్రలో చూసిన ఆనందం సోషల్ మీడియాలో కనిపిస్తోంది. విఎఫ్ఎక్స్ షాట్స్ గురించి కొన్ని కామెంట్స్ ఉన్నప్పటికీ అసలు ఆశలే తగ్గిపోయిన ప్రాజెక్టు నుంచి ఇంత క్వాలిటీ అవుట్ ఫుట్ రావడం పట్ల సంతోషం వ్యక్తం చేస్తున్నారు. విపరీతమైన వాయిదాలతో ఇప్పటికే చాలా ఆలస్యమైన వీరమల్లు జూలై 24 రావడంలో ఎలాంటి అనుమానం లేదు. డిస్ట్రిబ్యూటర్ల అగ్రిమెంట్లు, థియేటర్లు లాక్ చేయడాలు మొదలైపోయాయి. ఇంకో వారం రోజుల్లో బిజినెస్ కు సంబంధించి వివరాలు బయటికి వచ్చే అవకాశముంది.

ప్రమోషన్లలో తొలి అడుగు ట్రైలర్ రూపంలో ఓకే అనిపించుకుంది కానీ అసలైన కొండ ఇంకా ముందుంది. చేతిలో ఉన్న 20 రోజుల్లో పబ్లిసిటీని పీక్స్ కి తీసుకెళ్లాలి. ముఖ్యంగా హిందీ మార్కెట్ ని టార్గెట్ చేసుకుంటే రీచ్ పెరుగుతుంది. ఈ విషయంలో కుబేర విఫలమయ్యింది. కన్నప్ప కొంచెం బెటరే కానీ వీక్ డేస్ లో అది కూడా డ్రాప్ అయిపోయింది. చావా తరహా కంటెంట్ వీరమల్లులో ఉంది కాబట్టి ఉత్తరాది ప్రేక్షకులకు కనెక్ట్ అవుతుందనే నమ్మకం నిర్మాత ఏఎం రత్నంలో ఉంది. అదే జరిగితే పవన్ కు తొలి ప్యాన్ ఇండియా బ్లాక్ బస్టర్ దక్కుతుంది. బాబీ డియోల్ ఔరంగజేబుగా చేయడం మార్కెట్ పరంగా ప్లస్ అవుతోంది.

ప్రీ రిలీజ్ ఈవెంట్ ఎక్కడ చేస్తారనే క్లారిటీ ఇంకా రావాల్సి ఉంది. గతంలో తిరుపతిలో ప్లాన్ చేసుకుని క్యాన్సిల్ చేశారు. వారణాసిలో చేస్తే ఎలా ఉంటుందనే ఆలోచన టీమ్ లో ఉందట కానీ చేతిలో ఉన్న తక్కువ సమయంలో ప్లానింగ్, పర్మిషన్లు గట్రా కష్టమైపోతాయి. దీనికి సంబంధించిన ఇన్ఫో ఇంకా రావాల్సి ఉంది. నిధి అగర్వాల్ మాత్రం ఇదో లైఫ్ టైం ఆపార్చునిటీలా ఎక్కడికి పిలిచినా వెళ్లి తనవంతుగా ప్రమోషన్లు చేస్తోంది. ఏపీ తెలంగాణలో బిగ్గెస్ట్ రిలీజ్ ప్లాన్ చేసుకున్న హరిహర వీరమల్లుకి స్పెషల్ షోలు, టికెట్ రేట్ల పెంపు వగైరా వ్యవహారాలు ఎలాగూ ఉంటాయి. చూడాలి ఎలాంటి రికార్డులు నమోదవుతాయో.