కమల్ కొత్త సినిమా కబురు

ఓవైపు వరుస ఫ్లాపులు, ఇంకోవైపు రాజకీయాల్లో బిజీ.. ఇలా కొన్నేళ్ల ముందు కమల్ హాసన్‌ను అందరూ మరిచిపోయే పరిస్థితి కనిపించింది. అలాంటి సమయంలో ‘విక్రమ్’ సినిమాతో బలంగా బౌన్స్ బ్యాక్ అయ్యారు ఈ లెజెండరీ నటుడు. ఆ సినిమా తమిళనాట హైయెస్ట్ గ్రాసర్‌గా నిలిచే స్థాయిలో బ్లాక్ బస్టర్ అయింది. తెలుగులో కూడా చాలా బాగా ఆడింది. ఇండియన్-2, థగ్ లైఫ్ లాంటి క్రేజీ ప్రాజెక్టులు లైన్లో ఉండడంతో కమల్ మళ్లీ కెరీర్లో పీక్స్ చూడబోతున్నారని అభిమానులు ఆశించారు.

కానీ శంకర్ తీసిన ‘ఇండియన్-2’ కోలీవుడ్ ఆల్ టైం డిజాస్టర్లలో ఒకటిగా నిలిచింది. ‘థగ్ లైఫ్’ అయినా హిట్టవుతుందనుకుంటే.. అది కూడా ‘ఇండియన్-2’ తరహా ఫలితాన్నే అందుకుంది. దీంతో కమల్ తిరిగి ‘విక్రమ్’కు ముందు స్థితికి వెళ్లిపోయారు. ఆయన మార్కెట్ మళ్లీ బాగా డౌన్ అయిన సంకేతాలు కనిపిస్తున్నాయి. ఈ పరిస్థితుల్లో కమల్ ఎలాంటి సినిమా చేస్తాడా అని అందరూ ఎదురు చూస్తున్నారు. ‘విక్రమ్-2’ ప్రపోజల్ ఉంది కానీ.. అది ఇప్పుడిప్పుడే మొదలు కాదు. యాక్షన్ కొరియోగ్రాఫర్లు అన్బు-అరివుల దర్శకత్వంలో ఓ సినిమా అనుకున్నారు కానీ.. అది పెండింగ్‌లో పడిపోయింది. ‘ఇండియన్-3’కి సంబంధించి కొంత వర్క్ మిగిలి ఉండగా.. దాన్ని ముందుకు తీసుకెళ్లబోతున్న సంకేతాలేమీ కనిపించడం లేదు.

ఇవన్నీ కాదని కమల్ ఇప్పుడు ఓ కొత్త సినిమాను మొదలుపెట్టబోతున్నట్లు సమాచారం. సిద్దార్థ్ మూవీ ‘చిన్నా’తో మంచి పేరు సంపాదించి.. ఇటీవల విక్రమ్ సినిమా ‘వీర ధీర శూర-2’ ఓ మోస్తరు ఫలితాన్ని అందుకున్న అరుణ్ కుమార్ దర్శకత్వంలో కమల్ నటించబోతున్నారట. విక్రమ్‌తో ‘వీర ధీర శూర-1’ కూడా చేయాల్సి ఉన్నప్పటికీ.. దాని కంటే కమల్‌తో ఓ సినిమా చేయబోతున్నాడట అరుణ్. కథ ఓకే అయింది. ‘థగ్ లైఫ్’ దెబ్బ కొట్టినప్పటికీ ఈ చిత్రాన్ని కూడా తన సొంత నిర్మాణ సంస్థలోనే చేయబోతున్నాడట కమల్. త్వరలోనే ఈ సినిమా గురించి అధికారిక ప్రకటన రానుంది.