విజయ్ వదిలేసిన శర్వా సినిమా

ఒక హీరో చేయాల్సిన సినిమా ఇంకో హీరో చేతికి వెళ్లడం అన్నది సినీ రంగంలో చాలా కామన్ వ్యవహారం. ఇలా చేతులు మారిన సినిమాలు మంచి ఫలితాన్నందుకుని ముందు కథ విన్న హీరోలు చింతించేలా చేస్తుంటాయి. కొన్ని చిత్రాలు ఫెయిలై వాటిని వదులుకున్న హీరోలు హమ్మయ్య అనుకునేలా చేస్తాయి. శర్వానంద్ కెరీర్లో స్పెషల్ ఫిలింగా నిలిచిన ‘ఒకే ఒక జీవితం’ నిజానికి విజయ్ దేవరకొండ చేయాల్సిన సినిమా అట. తమిళంలో ‘కణం’ పేరుతో తెరకెక్కి.. తెలుగులో ‘ఒకే ఒక జీవితం’గా విడుదలైందీ సినిమా. ముందు దర్శకుడు శ్రీ కార్తీక్ ఈ కథను విజయ్‌కే చెప్పాడట. విజయ్‌కి ఆ కథ విపరీతంగా నచ్చేసిందట.

రెండుమూడు సార్లు ఈ కథ విని.. హీరోగా నటించడంతో పాటు స్వయంగా తనే నిర్మించాలని కూడా భావించాడట. మరో నిర్మాత కూడా ఈ సినిమాను ప్రొడ్యూస్ చేయడానికి ముందుకు వచ్చాడట. కానీ ఈ కథకు తాను న్యాయం చేయలేనేమో అనే అనుమానంతో ‘ఒకే ఒక జీవితం’ను వదులుకున్నట్లు విజయ్ తెలిపాడు. ఒక ప్రేక్షకుడిగా ఈ కథ విని ఎంజాయ్ చేస్తున్నాం సరే.. తాను అందులో ఫిట్ అవుతానా అని ఆలోచిస్తే.. తన మీద తనకు సందేహం కలిగి ఈ సినిమాను వదులుకున్నట్లు విజయ్ తెలిపాడు.

ఇక తన కొత్త చిత్రం ‘కింగ్‌డమ్’ గురించి చెబుతూ.. ఇది ప్రస్తుతానికి ఫ్రాంఛైజీ మూవీ కాదని చెప్పాడు. అలా అని పార్ట్-2 రాదనేమీ చెప్పలేమన్నాడు. దీన్ని ఒక కథగా చెప్పాలనే ‘కింగ్‌డమ్’ అనే టైటిల్ పెట్టామని.. సినిమా రిలీజయ్యాక ప్రేక్షకుల స్పందనను బట్టి పార్ట్-2 చేయాలా అనేది ఆలోచిస్తామని తెలిపాడు. ఈ చిత్రంతో తొలిసారిగా తనతో కలిసి పని చేసిన సంగీత దర్శకుడు అనిరుధ్ రవిచందర్ మీద విజయ్ ప్రశంసలు కురిపించాడు. తాను హీరో కాకముందే అతడికి ఫ్యాన్ అయిపోయానని.. తాను హీరో అయితే తనతో కలిసి పని చేయాలనుకున్నానని.. ‘అజ్ఞాతవాసి’లోని ‘గాలి వాలుగా’ అనిరుధ్ పాటల్లో తన ఫేవరెట్ అని విజయ్ తెలిపాడు.