‘తమ్ముడు’కి ఎన్నెన్ని కష్టాలో…

నితిన్ కెరీర్లో చాలా కీలకమైన సినిమా.. తమ్ముడు. ‘భీష్మ’ తర్వాత నితిన్‌కు ఓ మోస్తరు హిట్ కూడా లేదు. చెక్, రంగ్ దె, మాచర్ల నియోజకవర్గం, ఎక్స్‌ట్రా ఆర్డినరీ మ్యాన్.. ఇలా వరుసగా తన సినిమాలు నిరాశపరిచాయి. చివరి చిత్రం ‘రాబిన్ హుడ్’ అయినా మ్యాజిక్ చేస్తుందనుకుంటే అది మరో డిజాస్టర్ అయింది. దీంతో తర్వాతి చిత్రం ‘తమ్ముడు’ మీద చాలా ఆశలు పెట్టుకున్నాడతను. ‘వకీల్ సాబ్’ దర్శకుడు వేణు శ్రీరామ్ రూపొందిస్తున్న చిత్రమిది. ఈ సినిమా మేకింగ్ అనుకున్న దాని కంటే చాలా ఆలస్యం అయింది. బడ్జెట్ కూడా విపరీతంగా పెరిగిపోయింది. దీనికి తోడు ఈ చిత్రానికి సరైన రిలీజ్ డేటే కుదరట్లేదు.

ముందేమో మహాశివరాత్రి అన్నారు. తర్వాత వేసవి రిలీజ్ అన్నారు. చివరికి జులై 4కు కొత్త డేట్ ప్రకటించారు. ఈసారి పక్కాగా ఆ డేట్‌కు రిలీజ్ చేస్తామని చెప్పుకున్నారు. ఇటీవలే రిలీజ్ డేట్ మీదే ఒక స్పెషల్ వీడియో కూడా చేసింది ‘తమ్ముడు’ టీం. రిలీజ్ మళ్లీ మళ్లీ వాయిదా పడుతుండడం.. ఏదో ఒక డేట్ ఫిక్స్ చేయకపోవడం మీద టీం తమ మీద తామే సెటైర్లు వేసుకుని చివరికి జులై 4న సినిమా రాబోతోందని ప్రకటించుకున్నారు.

రెండు రోజుల ముందు కూడా ‘తమ్ముడు’ థీమ్ గురించి ఒక వీడియో రిలీజ్ చేసి అందులోనూ రిలీజ్ డేట్‌ను నొక్కి వక్కాణించారు. తీరా చూస్తే ‘కింగ్ డమ్’ కోసమని ఇప్పుడు ‘తమ్ముడు’ను వాయిదా వేసుకున్నారు. ఇలాంటి సర్దుబాట్లు ఇండస్ట్రీలో మామూలే కానీ.. అసలే నితిన్ స్ట్రగుల్లో ఉంటే తన సినిమాకు ఇన్నిసార్లు రిలీజ్ డేట్ మార్చి, ఇంత ఆలస్యం చేస్తే అది సినిమాకు నెగెటివ్ అయ్యే ప్రమాదముంది. వీలైనంత త్వరగా కొత్త డేట్ ఎంచుకుని.. ఆ తేదీకైనా పక్కాగా సినిమాను రిలీజ్ చేస్తే బెటర్.