శ్రీనిధి శెట్టి లీకులు వద్దన్నా వచ్చేశాయి

కొద్దిరోజుల క్రితం హిట్ 3 లో క్యామియో చేయబోయే స్టార్ హీరో పేరు బయటికి లీకైపోవడంతో దర్శకుడు శైలేష్ కొలను హర్ట్ అవ్వడం చూశాం. టెక్నాలజీ ఆధిపత్యం చెలాయించే ఈ వైరల్ ప్రపంచంలో ఇలాంటివి కట్టడి చేయడం కష్టమే కానీ వీటిని పాజిటివ్ గా తీసుకోవడం తప్ప వేరే ఆప్షన్ ఉండటం లేదు. అయితే అనుకోకుండా యూనిట్ సభ్యులే కొన్ని ముఖ్యమైన లీకులకు కారణమవ్వడం ఆశ్చర్యం కలిగించే విషయం. నిన్న జరిగిన ప్రీ రిలీజ్ ఈవెంట్ లో యాక్షన్ కొరియోగ్రాఫర్ సతీష్ మాట్లాడుతూ శ్రీనిధి శెట్టికి ఒక ఫైట్ ఉంటుందని, ఆవిడ చాలా బాగా చేసిందని చెప్పడమే కాక అడివి శేష్ ప్రస్తావన కూడా తీసుకొచ్చాడు.

యాంకర్ సుమ కనక అయ్యో అయ్యో అంటూ ఆపి ఉండకపోతే మరికొన్ని షేర్ చేసేవారేమో కానీ అక్కడితో స్పీచ్ కు సరదాగా బ్రేక్ పడింది. ఇదొక్కటే కాదు ఇంతకు ముందు వేరే భాషకు ఇచ్చిన మీడియా ఇంటర్వ్యూలో మీరు హిట్ 4లో మీరు ఉంటారా లేదాని శ్రీనిధిని అడిగితే, ఏమో కెజిఎఫ్ లాగా నన్ను చంపేస్తే ఏం చేయలేను కదా అంటూ ఇన్ డైరెక్ట్ గా హింట్ ఇవ్వడం ఫ్యాన్స్ రకరకాలుగా విశ్లేషించుకున్నారు. అంటే ఆ క్యారెక్టర్ చివరిదాకా ఉండదనే కోణంలో జోస్యం చెప్పేసుకున్నారు. సరే ఇలా కీలకమైన విషయాలు బయటికి రావడం వల్ల లాభమా నష్టమా అనే లెక్క కన్నా అవి ఆసక్తిని పెంచుతున్నాయనేది వాస్తవం.

కెజిఎఫ్ తర్వాత బ్రేక్ లేకపోవడంతో శ్రీనిధి శెట్టి ఆశలన్నీ దీని మీదే ఉన్నాయి. అందుకే నానితో కలిసి దేశామంతా ప్రమోషన్ల కోసం తిరిగింది. ప్రతి ఇంటర్వ్యూని వదలకుండా ఇచ్చింది. నాని ఒక్కడే ఏ ప్రమోషన్ చేయలేదు. శ్రీనిధిని ఎక్కడా మిస్సవ్వనివ్వలేదు. ఈ కెమిస్ట్రీ చూసి చాలా మంది హిట్ 3లో సగం లవ్ స్టోరీ ఉంటుందనుకుంటున్నారని నాని నిన్న ఈవెంట్ లో చెప్పడం విశేషం. గతంలో ఏ హీరోయిన్ నానితో ఇన్నేసి మీడియా ముఖాముఖీల్లో పాల్గొనలేదు. హిట్ 3 కనక సక్సెస్ అయ్యి తర్వాత సిద్ధూ జొన్నలగడ్డతో చేసిన తెలుసు కదా కూడా విజయం అందుకుంటే శ్రీనిధి శెట్టికి తెలుగులో కెరీర్ దొరికినట్టే. చూద్దాం.