సలార్ సంగీత దర్శకుడు డైరెక్టరయ్యాడు

కెజిఎఫ్, సలార్ తో టాలీవుడ్ ప్రేక్షకులకూ దగ్గరైన సంగీత దర్శకుడు రవి బస్రూర్ మెగా ఫోన్ చేపట్టాడు. ఈయన డైరెక్షన్ చేసిన వీర చంద్ర హాస మొన్న శుక్రవారం కర్ణాటక థియేటర్లలో పెద్ద ఎత్తున విడుదలయ్యింది. పాజిటివ్ టాక్ తో మంచి వసూళ్లు తెచ్చుకునే దిశగా పరుగులు పెడుతోంది. తెలుగు డబ్బింగ్ వచ్చే వారం ఏప్రిల్ 25 రిలీజ్ చేస్తున్నారు. మరీ ఆలస్యం చేయకుండా త్వరగా తీసుకురావడం మంచి ఆలోచనే. జానపద కళల మీద విపరీతమైన ఇష్టమున్న రవి బస్రూర్ ఈ వీరచంద్రహాస కోసం యక్షగానం నేపధ్యాన్ని తీసుకున్నాడు. పది నిమిషాలు తక్కువ మూడు గంటల నిడివితో దీన్ని రూపొందించాడు.

థియేటర్ ఎక్స్ పీరియన్స్ పరంగా చెప్పాలంటే ఇదో కొత్త అనుభూతిని ఇవ్వనుంది. తెలుగు వాళ్ళకూ పరిచయమున్న యక్ష గానం కొత్త జనరేషన్ కు తెలియకుండా పోయింది. అయితే కన్నడనాట దీనికి ఆదరణ ఉంది. అందుకే రవి బస్రూర్ ఈ ప్రపంచాన్ని సరికొత్తగా పరిచయం చేయాలని ఇలాంటి బ్యాక్ డ్రాప్ ఎంచుకున్నాడు. సంగీతం తనే సమకూర్చుకుని రెండు బాధ్యతలు నెరవేర్చాడు. అయితే మ్యూజిక్ డైరెక్టర్లు దర్శకులుగా మారిన దాఖలాలు ఇప్పటి తరంలో అస్సలు లేవు. ఇళయరాజా, కీరవాణి, మణిశర్మ, రాజ్ కోటి, ఏఆర్ రెహమాన్, దేవిశ్రీ ప్రసాద్, తమన్, మిక్కీ జె మేయర్ ఇలా ఎవరూ దీని జోలికి వెళ్ళిందే లేదు.

కానీ రవి బస్రూర్ ఈ సాహసం చేశాడు. వీరచంద్రహాసలో మరో విశేషం ఏంటంటే శాండల్ వుడ్ స్టార్ శివరాజ్ కుమార్ ఒక కీలకమైన క్యామియో చేయడం. జైలర్, పెద్ది ద్వారా మనకూ దగ్గరైన ఈ సీనియర్ నటుడి స్క్రీన్ ప్రెజెన్స్ చంద్రహాసకు బాగా ఉపయోగపడిందని అక్కడి టాక్. కాకపోతే కన్నడ నేటివిటీ దట్టంగా ఉన్న ఈ స్టేజి డ్రామా తరహా కంటెంట్ ని మనోళ్లు ఎలా తీసుకుంటారనేది చూడాలి. మహాభారతంలోని అశ్వమేధిక పర్వంని స్ఫూర్తిగా తీసుకుని అల్లుకున్న కథగా ఇందులో డెప్త్ చాలా ఉంటుంది. అన్నట్టు కాంతార ఇచ్చిన స్ఫూర్తి శాండల్ వుడ్ మీద మాములుగా లేదు. వీరచంద్రహాస కూడా ఆ బాపతే.