రవితేజ-శ్రీలీల.. మళ్లీ ఫైరే

మాస్ రాజా రవితేజకు గత కొన్నేళ్లలో పెద్ద హిట్ అంటే.. ధమాకానే. ఈ సినిమా డివైడ్ టాక్ తెచ్చుకుని కూడా బ్లాక్ బస్టర్ అయింది. వంద కోట్లకు పైగా వసూళ్లు రాబట్టింది. ఈ చిత్రానికి మేజర్ హైలైట్ అంటే.. మాస్ పాటలు, అందులో అదిరిపోయే శ్రీలీల స్టెప్పులే. రవితేజ పక్కన శ్రీలీల ఏంటి అని రిలీజ్‌కు ముందు చాలామంది కామెంట్లు చేశారు కానీ.. ఆ జోడీ మాస్ పాటలతో స్క్రీన్లను తగలెట్టేసింది. ఇప్పుడు ఈ జోడీని మళ్లీ తెరపై చూడబోతున్నాం. రవితేజ కొత్త చిత్రం ‘మాస్ జాతర’లోనూ శ్రీలీలే హీరోయిన్. ‘ధమాకా’కు సంగీతం అందించిన భీమ్స్ సిసిరోలియోనే ఈ చిత్రానికీ మ్యూజిక్ చేశాడు. అసలే రవితేజ సినిమా.

పైగా ‘మాస్ జాతర’ అనే టైటిల్ పెట్టారు. పైగా రవితేజకు బాగా కలిసొచ్చిన పోలీస్ పాత్ర చేస్తున్నాడిందులో. దీంతో మాస్ రాజా మాస్ ఫ్యాన్స్ అంచనాలు మామూలుగా లేవు. ఈ చిత్రం నుంచి తొలి పాట గురించి తాజాగా అప్‌డేట్ వచ్చింది. ఈ పాట ప్రోమో రవితేజ అభిమానుల్లో మాంచి హుషారు పుట్టించింది. ఇందులో రవితేజ తన ఫేమస్ ‘ఇడియట్’ స్టెప్ వేయడం విశేషం. ఆ చిత్రంలో చూపుల్తో గుచ్చి గుచ్చి పాటకు రవితేజ వేసిన స్టెప్ ఐకానిక్‌గా నిలిచిపోయింది.

ఈ సినిమా వచ్చిన ఇన్నేళ్లకు మళ్లీ ఆ స్టెప్‌ను రీక్రియేట్ చేయించారు రవితేజతో. ఈ స్టెప్ నోస్టాల్జిగ్గా అనిపించగా.. పక్కనే శ్రీ లీల కూడా ఉండడంతో ఈ పాట మీద అంచనాలు పెరిగిపోయాయి. ‘ధమాకా’ తర్వాత మరోసారి రవితేజ-శ్రీలీల జోడీ స్క్రీన్ మీద మాంచి ఫైర్ చూపించబోతోందని అర్థమవుతోంది. మంచి ఫాంలో ఉన్న భీమ్స్ నుంచి ఊపున్న మాస్ పాటను ఆశిస్తున్నారు అభిమానులు. ‘సామజవరగమన’ రైటర్ భాను భోగవరపు ఈ చిత్రంతో దర్శకుడిగా పరిచయం అవుతున్నాడు. సితార సంస్థ నిర్మిస్తున్న ఈ చిత్రం జులైలో ప్రేక్షకుల ముందుకు రానుంది.