పవన్ సినిమా క్యాన్సిల్.. ఆశ్చర్యమేముంది?

పవర్ స్టార్ పవన్ కళ్యాణ్ హీరోగా ఆయన మిత్రుడైన రామ్ తాళ్ళూరి గతంలో ఓ సినిమా అనౌన్స్ చేసిన సంగతి గుర్తుండే ఉంటుంది. ఎస్ఆర్‌టీ ఎంటర్టైన్మెంట్స్ బేనర్ మీద సురేందర్ రెడ్డి దర్శకత్వంలో ఈ సినిమా తెరకెక్కాల్సింది. దీనికో ప్రి లుక్ పోస్టర్ కూడా డిజైన్ చేసింది చిత్ర బృందం. కానీ ఈ సినిమాను ప్రకటించి ఏళ్లు గడిచినా ఏ అప్‌డేట్ లేదు. పవన్ చేతిలో ఆల్రెడీ మూడు చిత్రాలున్నాయి. అవే పూర్తి కాలేదు. ఈ మూడూ ఫినిష్ అయ్యి ఎప్పుడు ప్రేక్షకుల ముందుకు వస్తాయో తెలియట్లేదు. పవన్ చూస్తే రాజకీయాల్లో ఫుల్ బిజీగా ఉన్నాడు. ఈ నేపథ్యంలో రామ్ నిర్మాణంలో సురేందర్ తీయాల్సిన ఈ చిత్రాన్ని ఇప్పుడు క్యాన్సిల్ చేశారు.

ఈ మేరకు మీడియాకు నిర్మాణ సంస్థ సమాచారం ఇచ్చింది. ఐతే పవన్ సినిమా క్యాన్సిల్ అయిపోయిందంటూ సోషల్ మీడియాలో కొందరు ఆశ్చర్యపోతున్నారు. ఇదేదో కొత్త విషయంలా మాట్లాడుతున్నారు. కానీ ఈ చిత్రంపై నిర్మాత రామ్ తాళ్ళూరి ఎప్పుడో ఆశలు కోల్పోయారు. తన ప్రొడక్షన్లో వచ్చిన చివరి చిత్రం ‘మెకానిక్ రాకీ’ రిలీజ్ టైంలోనే ఆయనీ విషయమై క్లారిటీ ఇచ్చారు. పవన్ సినిమా మీద తాము ఆశలు కోల్పోయామన్నారు.

పవన్ ప్రస్తుతం ఉన్న బిజీలో ఈ సినిమా చేస్తామనే వాస్తవిక అంచనా లేదని చెప్పేశారు. మరోవైపు సురేందర్ రెడ్డి చూస్తే ఈ సినిమా ఊసే ఎత్తకుండా వేరే ప్రయత్నాలేవో చేసుకుంటున్నాడు. అధికారికంగా ప్రకటించలేదన్న మాటే కానీ.. ఈ మూవీ ఎప్పుడో క్యాన్సిల్ అయిపోయినట్లే. ఇప్పుడు లాంఛనం ముగిసింది అన్నమాట. అసలు హరీష్ శంకర్ డైరెక్షన్లో ఆల్రెడీ కొంత చిత్రీకరణ జరుపుకున్న ‘ఉస్తాద్ భగత్ సింగ్’ ముందుకు కదులుతుందో లేదో అన్న సందేహాలు కలుగుతుండడం గమనార్హం.