క్లయిమాక్స్ గెస్‍ చెయ్యకుండా బిగ్‍బాస్‍ జిత్తులు

గత రెండు సీజన్లలో ఒక కంటెస్టెంట్‍కి పబ్లిక్‍ ఫుల్‍ సపోర్ట్ గా నిలబడిపోవడంతో విజేత ఎవరనేది చాలా ముందుగానే తెలిసిపోయింది. ఈసారి అలా జరగకుండా బిగ్‍బాస్‍ యమ జాగ్రత్త పడుతున్నట్టు అనిపిస్తోంది. అసలే ఐపీఎల్‍ తాకిడికి ఇబ్బంది పడుతోన్న బిగ్‍బాస్‍ షో ఇక విజేత ఎవరనేది ముందే తెలిసిపోతే కనుక పూర్తిగా చప్పబడిపోతుంది. అందుకే ఈ సీజన్‍ని తమకు నచ్చిన విధంగా నడిపిస్తోన్న భావన కలుగుతోంది.

ఫలానా కంటెస్టెంట్లు హౌస్‍లో వుండాలి, అదే సమయంలో వాళ్లు స్ట్రాంగ్‍ అయిపోకుండా చూసుకోవాలి. ఇదే అజెండాతో ఈ సీజన్‍ నడుస్తోంది. టిక్‍టాకర్‍ మెహబూబ్‍ పట్ల మొదట్నుంచీ ఆడియన్స్లో నెగెటివ్‍ ఫీలింగ్‍ వచ్చింది. నిజానికి అతను ఎప్పుడో ఎలిమినేట్‍ అయిపోయి వుండాలి. విచిత్రంగా స్ట్రాంగ్‍ అనిపిస్తోన్న దేవి నాగవల్లిని ఎలిమినేట్‍ చేసేసి టాస్కులలో ‘బండ రాముడి’లా ఆడుతూ మసాలా అందిస్తోన్న మెహబూబ్‍ని కాపాడుకున్నారు.

ఈవారం కనుక మెహబూబ్‍ నామినేట్‍ అయితే ఖచ్చితంగా అవుట్‍ అయిపోయేవాడు. మెహబూబ్‍ని చాలా మంది నామినేట్‍ చేసారు కూడా. కానీ కెప్టెన్‍ సోహైల్‍కి ఒక పవర్‍ ఇచ్చి ఒకరిని కాపాడే శక్తినిచ్చారు. సోహైల్‍కి హౌస్‍లో క్లోజ్‍ ఫ్రెండ్‍ మెహబూబ్‍ కనుక అతడినే సోహైల్‍ కాపాడతాడని బిగ్‍బాస్‍కి కూడా తెలుసు. కావాలనే ఆ పవర్‍ సోహైల్‍కి ఇచ్చి మరో రెండు వారాల పాటు మెహబూబ్‍ లోపల వుండేలా చూసుకున్నారు.

అదే సమయంలో సోహైల్‍కి, అభిజీత్‍కి పెరుగుతోన్న ఫాలోయింగ్‍తో వాళ్లిద్దరూ డిఫెన్స్లో పడేలా వీకెండ్‍లో నాగార్జునతో డోస్‍ ఇప్పించారు. వారి గేమ్‍ స్టయిల్‍ మారితే మరెవరైనా స్ట్రాంగ్‍ అయి విజేత ఎవరవుతారనేది ఆసక్తికరంగా మారుతుందనేది బిగ్‍బాస్‍ గేమ్‍ ప్లాన్‍ అయి వుండొచ్చు.