సత్యం సుందరం దర్శకుడి వింత అనుభవం!

ఏ సినిమాకైనా ఎడిటింగ్ టేబుల్ దగ్గర కోతకు గురైన సీన్లు, భాగాలు ఖచ్చితంగా ఉంటాయి. ఒకవేళ అవి ప్రేక్షకులను ఆకట్టుకుంటాయని దర్శకులు భావిస్తే వాటిని ఓటిటి లేదా యూట్యూబ్ లో అప్లోడ్ చేసి ఆ ముచ్చట తీర్చుకుంటారు. కానీ అదే పనిగా ఆడియన్స్ డిమాండ్ చేసే సందర్భాలు తక్కువగా ఉంటాయి. సత్యం సుందరం అలాంటి అరుదైన కోవలోకి వస్తోంది. విడుదలైన టైంలో విమర్శకుల ప్రశంసలు అందుకున్న ఈ ఎమోషనల్ డ్రామా థియేటర్లలో కమర్షియల్ గా అద్భుతాలు చేయలేదు. తెలుగు తమిళం నయం కానీ ఇతర భాషల్లో డిజాస్టర్ అనిపించుకుంది. తర్వాత నెట్ ఫ్లిక్స్ లో వచ్చింది.

ట్విస్ట్ ఏంటంటే సత్యం సుందరంలో దర్శకుడు ప్రేమ్ కుమార్ కట్ చేసిన 18 నిమిషాలను తర్వాత జోడించమని చాలా మంది ఒత్తిడి చేశారు. కనీసం మూడో వారం నుంచైనా పెట్టొచ్చు కదాని ఫోన్లు, మెసేజ్ లు చేశారు. ఓటిటిలో వచ్చాక ఇంత మంచి చిత్రం మిస్ అయినందుకు బాధ పడుతున్నామని, గూగుల్ పేలో డబ్బులు వేసి నిర్మాతకు పంపమని అడిగారు. దీంతో షాక్ తినడం ప్రేమ్ కుమార్ వంతయ్యింది. అదేదో వాళ్ళందరూ థియేటర్లకు వచ్చి చూసి ఉంటే కమర్షియల్ గానూ సత్యం సుందరం స్కేల్ పెరిగేది కదా. డిజిటల్ లో చూశాక ఆహా ఓహో అంటే లాభం ఏముంటుంది. ఇదంతా ఒక ఇంటర్వ్యూలో ఆయనే పంచుకున్నారు.

దీని సంగతలా ఉంచితే ప్రేమ్ కుమార్ కు చాలా పేరు తీసుకొచ్చిన 96 సీక్వెల్ కి స్క్రిప్ట్ రెడీ అవుతోంది. ముప్పాతిక భాగం పూర్తి చేశారు. విజయ్ సేతుపతి, త్రిషలే కొనసాగుతారా లేక ఇంకో కొత్త జంటను తీసుకుంటారా అనేది సస్పెన్స్ గా మారింది. ఇదే 96ని తెలుగులో శర్వానంద్, సమంతలతో జానుగా రీమేక్ చేసిన సంగతి తెలిసిందే. ప్రేమ్ కుమారే దర్శకత్వం వహించారు కానీ ఆశించిన ఫలితం అందుకోలేదు. భావోద్వేగాలను అద్భుతంగా చూపిస్తారనే పేరున్న ఈ విలక్షణ దర్శకుడు 96 టూలో ఏం చూపిస్తారనేది ఆసక్తికరంగా మారింది. అయితే ఈసారి రీమేక్ కాకుండా డబ్బింగ్ మాత్రమే వస్తుందేమో.