రివర్స్ గేమ్ ఆడబోతున్న ఉపేంద్ర ?

అర్ధమయ్యి కానట్టు, అసలు అర్థమే లేనట్టు, అర్థం చేసుకుంటే ఏదో ఉన్నట్టు అనిపించే ఒక వెరైటీ సినిమా తీసిన ఉపేంద్ర యుఐ రూపంలో తెలుగులో ఏమో కానీ కన్నడలో మాత్రం బ్లాక్ బస్టర్ అందుకునేలా ఉన్నారు. అలాని ఇక్కడ వసూళ్లు మరీ తీసికట్టుగా ఏం లేవు. ముఖ్యంగా ఏ సెంటర్స్ లో మంచి ఆక్యుపెన్సీలు నమోదమవుతున్నాయి. ఇంతమంది విచిత్రంగా మాట్లాడుకునేంతగా యుఐలో ఏముందో తెలుసుకోవడం కోసం థియేటర్లకు వెళ్తున్న ఆడియన్స్ ఎక్కువగా ఉన్నారు. బుక్ మై షోలో యుఐ అన్ని భాషలు కలిపి శాండల్ వుడ్ గతంలో నమోదు చేసిన దర్శన్ కాటేరా రికార్డుని దాటేసింది.

ఇప్పుడో కొత్త ట్విస్టు ఏంటంటే ఉపేంద్ర సోమవారం లేదా మరో రెండు మూడు రోజుల్లో సెకండాఫ్ ని ఫస్ట్ హాఫ్ లో, ఫస్ట్ హాఫ్ ని సెకండాఫ్ కి మార్చేసి కొత్త వెర్షన్ చూపించబోతున్నారని బెంగళూరు టాక్. అంటే అచ్చంగా రివర్స్ గేమ్ అన్న మాట. నిజంగా అన్నంత పని చేస్తారా అంటే ఏమో చేసినా ఏ మాత్రం ఆశ్చర్యపోనక్కర్లేదు. సామాజిక పరిస్థితుల మీద సెటైర్లు వేసిన ఉపేంద్ర కంటెంట్ ని అర్థం చేసుకోవడం కామన్ ఆడియన్స్ వల్ల కావడం లేదు. కానీ కలెక్షన్లు మాత్రం బాగున్నాయి. పక్కరాష్టాల్లోని కొన్ని చోట్ల అదే రోజు ఇతర సినిమాలకు కేటాయించిన స్క్రీన్లు మార్చి యుఐకి ఇవ్వడం మరో మలుపు.

చివరికి ఉపేంద్ర ఎలాంటి ఫలితం అందుకుంటారో కానీ తెలుగు రాష్ట్రాల్లో స్పందన పెరిగే అవకాశాలు చూసి సక్సెస్ టూర్లు మొదలుపెడుతున్నారు. అయినా యుఐ లాంటి ప్రయోగాలు అందరు చేసేవి కాదు. అందులోనూ యునానిమస్ గా అటు పాజిటివ్ ఇటు నెగటివ్ రెండూ అనిపించుకోకుండా మధ్యలో ఊగిసలాడే టాక్ తెచ్చుకోవడం కూడా ఆయనకే చెల్లింది. పైగా సినిమాను అర్థం చేసుకోవాలంటే డీ కోడ్ చేసుకోండి, మీరు తెలివైన వాళ్లయితే థియేటర్ నుంచి వెళ్లిపోండి, మూర్ఖులైతే ఉండిపోండి అని కార్డు వేయడం ఉపేంద్రకు మాత్రమే సాధ్యం. మరి రివర్స్ గేమ్ విషయంలో ఏం చేస్తారో.