30 రోజులకే ఇంటికి వస్తున్న ‘క’

దీపావళికి విడుదలై సూపర్ హిట్ కొట్టేసిన ‘క’ ఓటిటిలో వచ్చేస్తోంది. వచ్చే నవంబర్ 28 నుంచి ఈటీవీ విన్ లో స్ట్రీమింగ్ చేయబోతున్నట్టు అధికారికంగా ప్రకటించారు. అంటే సరిగ్గా నెల రోజులకు డిజిటల్ రిలీజన్న మాట. నిన్నే మలయాళం డబ్బింగ్ వెర్షన్ థియేటర్లలో అడుగు పెట్టిన సంగతి తెలిసిందే. అక్కడి రెస్పాన్స్ సంగతి పక్కనపెడితే ఇంత త్వరగా ఒక సూపర్ హిట్ మూవీ స్మార్ట్ స్క్రీన్ పై రావడం కొత్తేమి కాదు కానీ ఇంకొన్ని రోజులు ఆగి ఉంటే బాగుండేదని ఫ్యాన్స్ అభిప్రాయం. కానీ ఇప్పటికే థియేట్రికల్ రన్ పూర్తి చేసుకున్న ‘క’ ఇంకా కొనసాగుతోంది కానీ కలెక్షన్లు నామమాత్రంగానే ఉంటున్నాయి.

అయితే ‘క’ ఓటిటి వెర్షన్ కు ఒక ప్రత్యేకత ఉంది. మొదటిసారి డాల్బీ విజన్ సినిమా, అట్మోస్ సౌండ్ తో స్ట్రీమింగ్ చేయబోతున్నారు. మంచి 4కె స్క్రీన్ ఉంటే మాత్రం బెస్ట్ క్వాలిటీని ఎంజాయ్ చేయొచ్చు. సుజీత్ సందీప్ జంటగా దర్శకత్వం వహించిన ఈ విలేజ్ థ్రిల్లర్ కు క్లైమాక్స్ ఆయువుపట్టుగా నిలిచింది. నాగ చైతన్య ప్రీ రిలీజ్ ఈవెంట్ కి గెస్టుగా రావడం, కిరణ్ అబ్బవరం ఆవేదన కలిగిన స్పీచ్ ఓపెనింగ్స్ కి బాగా దోహదపడ్డాయి. దానికి తగ్గట్టే కంటెంట్ థ్రిల్లింగ్ గా ఉండటంతో ప్రేక్షకులు సూపర్ హిట్ చేశారు.

లక్కీ భాస్కర్, అమరన్ పోటీని తట్టుకుని నిలవడం ‘క’ గర్వించాల్సిన అసలు విషయం. ట్విస్ట్ ఏంటంటే ‘క’కు రెండు మూడు రోజుల గ్యాప్ లోనే లక్కీ భాస్కర్, అమరన్ కూడా ఓటిటిలో వస్తాయన్న వార్తల నేపథ్యంలో ఈ వారం సినీ ప్రియులకు ఇంట్లోనే మూవీ ఫెస్టివల్ ఖాయమనేలా ఉంది. వీటికి సంబంధించిన ప్రకటన ఇంకా రావాల్సి ఉంది. ‘క’ సక్సెస్ తర్వాత కిరణ్ ప్రశాంతంగా ఉన్నాడు. త్వరలోనే దిల్ రుబా విడుదలకు రెడీ అవుతోంది. రొమాంటిక్ లవ్ స్టోరీగా రూపొందిన ఈ సినిమాకు ‘క’ పుణ్యమాని బిజినెస్ ఆఫర్స్ బాగుంటాయి. వచ్చే ఏడాది ప్రథమార్థంలో విడుదలకు సన్నాహాలు చేస్తున్నారు