బాలయ్య 111 కాంబినేషన్ సిద్ధం ?

బాలకృష్ణకు భగవంత్ కేసరి లాంటి బ్లాక్ బస్టర్ ఇచ్చిన దర్శకుడు అనిల్ రావిపూడి మరోసారి బాలయ్యతో జట్టు కట్టబోతున్నట్టు లేటెస్ట్ అప్డేట్. ఇంకా అఫీషియల్ గా అనౌన్స్ చేయలేదు కానీ ప్రాథమికంగా కథకు సంబంధించిన అంగీకారం గతంలోనే జరిగిపోయిందట. అయితే వెంకటేష్ 76లో బిజీగా ఉన్న రావిపూడి డిసెంబర్ చివరివారంలోగా ఫ్రీ అవుతాడు. ప్రమోషన్ల కోసం ఇంకో నెల రోజులు అనుకున్నా ఫిబ్రవరి నుంచి స్క్రిప్ట్ పనుల మీద ఉండొచ్చు. ప్రస్తుతం బాబీ డైరెక్షన్లో తన 109వ సినిమా చేస్తున్న బాలయ్య 110గా బోయపాటి శీనుతో అఖండ 2 తాండవం మొదలుపెట్టిన సంగతి తెలిసిందే.

నిజానికి అనిల్ రావిపూడి చిరంజీవితో సినిమా కోసం ప్రయత్నిస్తూనే ఉన్నాడు కానీ కథ విషయంలో ఊగిసలాట వల్ల పెండింగ్ పడుతూ వస్తోందట. షైన్ స్క్రీన్స్ ఈ కాంబోని సెట్ చేయడానికి ట్రై చేస్తోంది కానీ పనవ్వడం లేదని ఫిలిం నగర్ టాక్. ఓకే అయితే తప్ప అధికారికంగా ఏదీ చెప్పలేరు కాబట్టి ప్రస్తుతానికి గాసిప్ గానే చూడాలి. భగవంత్ కేసరిలో వయసుకు తగ్గ మాస్ పాత్రను డిజైన్ చేసి ప్రశంసలు దక్కించుకున్న అనిల్ రావిపూడి దానికి అవార్డులు కూడా సాధించాడు. ప్రస్తుతం కోలీవుడ్ స్టార్ హీరో విజయ్ రాజకీయ ప్రవేశానికి ముందు చేస్తున్న చివరి సినిమా కూడా దీని రీమేకేననే ప్రచారం ఉంది.

గ్యాప్ లేకుండా వరసగా సినిమాలు చేసుకుంటున్న బాలకృష్ణ వచ్చే ఏడాది ఎన్బికె 109తో పాటు ఏడాది చివర్లో అఖండ 2 రిలీజ్ ఉండేలా చూసుకుంటున్నారు. ఒకవేళ బోయపాటి కనక ఏమైనా ఆలస్యం చేస్తే 2026 సంక్రాంతి బరిలో ఉండొచ్చు. ప్రస్తుతం అన్ స్టాపబుల్ సీజన్ 4 షూటింగ్ తో పాటు బాబీ సినిమా చివరి దశ చిత్రీకరణలో బిజీగా ఉన్న బాలయ్య ఇవి కాకుండా ఇంకెవరికి కమిట్ మెంట్స్ ఇవ్వలేదు. కొన్ని కథలు చర్చల దశలో ఉన్నాయి. మోక్షజ్ఞ తెరంగేట్రం చేయబోతున్న చిత్రం డిసెంబర్ నుంచి రెగ్యులర్ సెట్స్ మీదకు వెళ్లబోతోందని సమాచారం. ఇందులో బాలకృష్ణ క్యామియో ఉండొచ్చని టాక్.