బాహుబలి-2ను కొట్టబోతున్న పుష్ప-2

వసూళ్ల పరంగానే కాక రలీజ్ విషయంలోనూ ‘బాహుబలి: ది కంక్లూజన్’ అనేక రికార్డులను బద్దలు కొట్టింది. అప్పటిదాకా ఏ సినిమా రిలీజ్ కానన్ని థియేటర్లలో ఈ చిత్రాన్ని విడుదల చేశారు. ఏకంగా పది వేల థియేటర్లకు పైగానే ఆ చిత్రాన్ని ప్రదర్శించాయి. ‘బాహుబలి’ తర్వాత మరే ఇండియన్ మూవీ కూడా అన్ని థియేటర్లలో రిలీజ్ కాలేదు.

‘ఆర్ఆర్ఆర్’ సైతం ఆ రికార్డును కొట్టలేకపోయింది. ఐతే ఇప్పుడు ‘పుష్ప-2’.. బాహుబలి-2 రికార్డును కొట్టబోతున్నట్లు సమాచారం. ‘బాహుబలి’ లాంటి ఈవెంట్ ఫిలిం కాకపోయినా దీనికి పాన్ ఇండియా లెవెల్లో క్రేజ్ వచ్చింది. సీక్వెల్ కోసం దేశవ్యాప్తంగా ప్రేక్షకులు అమితాసక్తితో ఎదురు చూస్తున్నారు. ఈ క్రేజ్‌ను ఉపయోగించుకుని భారీ ఓపెనింగ్స్ రాబట్టే దిశగా ‘పుష్ప-2’ను భారీగా రిలీజ్ చేయడానికి నిర్మాతలు సన్నాహాలు చేస్తున్నారు.

‘పుష్ప-2’ వరల్డ్ వైడ్ ఏకంగా 11,500 స్క్రీన్లలో రిలీజ్ కాబోతోందట. అందుటో ఇండియా వరకే 6500 స్క్రీన్లలో విడుదలవుతుంది. విదేశాల్లో 5 వేల స్క్రీన్లలో సినిమా ప్రదర్శితం కానుంది. ఇప్పటిదాకా ఏ ఇండియన్ మూవీ కూడా ఈ స్థాయిలో రిలీజ్ కాలేదు. ‘పుష్ప: ది రైజ్’ రిలీజ్‌కు ముందు దాని మీద పాన్ ఇండియా స్థాయిలో పెద్దగా అంచనాల్లేవు.

తెలుగు వరకు మాత్రమే హైప్ ఉంది. కానీ రిలీజ్ తర్వాత నార్త్ ఇండియన్స్ ఈ సినిమా చూసి ఊగిపోయారు. తమిళనాడు, కేరళ రాష్ట్రాల్లో కూడా సినిమా బాగా ఆడింది. దీంతో సీక్వెల్ మీద పాన్ ఇండియా స్థాయిలో భారీగా అంచనాలు పెరిగిపోయాయి.

తెలుగు సినిమాలను పెద్దగా పట్టించుకోని పశ్చిమ బెంగాల్ లాంటి ప్రాంతాల్లో కూడా ‘పుష్ప-2’కు మామూలు హైప్ లేదు. ఈ నేపథ్యంలోనే సినిమాను కనీ వినీ ఎరుగని స్థాయిలో రిలీజ్ చేయబోతున్నారు. డిసెంబరు 5న ఈ చిత్రం ప్రేక్షకుల ముందుకు రానున్న సంగతి తెలిసిందే.