వియత్నాం ఎయిర్‌పోర్టులో మన పరువు తీశారుగా!

విదేశాలకు వెళ్లడం అంటే కేవలం కొత్త ప్రాంతాలను సందర్శించడం, ఫొటోలు దిగడం, అక్కడి అందాలను ఆస్వాదించడం మాత్రమే కాదు. మన ప్రవర్తనతో దేశ గౌరవాన్ని కూడా నిలబెట్టాల్సిన బాధ్యత ఉంటుంది. కానీ కొందరి విచిత్రమైన ప్రవర్తన కారణంగా ఇప్పుడు భారతీయ ప్రయాణికులు సోషల్ మీడియాలో విమర్శలు ఎదుర్కొంటున్నారు. వియత్నాంలోని ఓ విమానాశ్రయంలో భారతీయ పర్యాటకుల బృందం చేసిన పని ప్రస్తుతం ఇంటర్నెట్‌లో చర్చనీయాంశంగా మారింది. విమానాశ్రయాన్ని పిక్నిక్ ప్రదేశంగా భావించి, అక్కడే నేలపై కూర్చొని సామూహికంగా భోజనం చేయడం విమర్శలకు కారణమైంది.

సోషల్ మీడియాలో వైరల్ అవుతున్న వీడియోలో సుమారు 15 నుంచి 20 మంది భారతీయ పర్యాటకులు విమానాశ్రయ టెర్మినల్‌లోని ఓ ఖాళీ ప్రదేశంలో నేలపై కూర్చున్నట్లు కనిపిస్తున్నారు. తమ వెంట తెచ్చుకున్న వార్తాపత్రికలను నేలపై పరిచి, వాటిపై ఆహార పదార్థాలను ఉంచుకున్నారు. అనంతరం డిస్పోజబుల్ ప్లేట్లలో భోజనం చేస్తూ కనిపించారు. ఈ సమయంలో కొందరు కెమెరా వైపు చూస్తూ నవ్వడం, వీడియోకు ఫోజులివ్వడం కూడా కనిపించింది. అక్కడ కూర్చోవడానికి కుర్చీలు అందుబాటులో ఉన్నప్పటికీ వాటిని ఉపయోగించకుండా నేలపై భోజనం చేయడం పలువురికి అభ్యంతరకరంగా అనిపించింది.

ఈ వీడియో బయటకు రావడంతో సామాజిక మాధ్యమాల్లో భిన్నమైన స్పందనలు వ్యక్తమవుతున్నాయి. ముఖ్యంగా విదేశాల్లో ఉన్నప్పుడు కనీస పౌర బాధ్యత, పరిసరాల పట్ల గౌరవం పాటించాలని పలువురు సూచిస్తున్నారు. పారిశ్రామికవేత్త హర్ష్ గోయెంకా కూడా ఈ ఘటనపై స్పందిస్తూ ప్రజా ప్రదేశాల్లో ప్రవర్తనా నియమాలు, పౌర స్పృహ ఎంత ముఖ్యమో చర్చకు తెచ్చారు. ఒక దేశానికి వెళ్లినప్పుడు అక్కడి సంస్కృతి, నిబంధనలు, ఇతర ప్రయాణికుల సౌకర్యాలను గౌరవించాల్సిన అవసరం ఉందనే అభిప్రాయాలు వ్యక్తమవుతున్నాయి.

అయితే ఈ ఘటనపై అందరూ ఒకే అభిప్రాయంతో లేరు. కొందరు ప్రయాణికులు కలిసి భోజనం చేయడంలో తప్పేముందని ప్రశ్నిస్తున్నారు. ఆహారం తినడం నేరం కాదని, ఎవరినీ ఇబ్బంది పెట్టకుండా ఉంటే దాన్ని పెద్ద వివాదంగా మార్చాల్సిన అవసరం లేదని వాదిస్తున్నారు. కానీ అసలు సమస్య భోజనం చేయడంలో కాదు.. దానికి ఎంచుకున్న ప్రదేశం, పాటించిన పద్ధతిలో ఉందనే విషయాన్ని గుర్తించాలి. విమానాశ్రయం అనేది వేలాది మంది ప్రయాణికులు ఉపయోగించే ఉమ్మడి ప్రదేశం. అక్కడి పరిశుభ్రత, క్రమశిక్షణ, ఇతరుల సౌకర్యం కూడా ముఖ్యమే.

ఇలాంటి ఘటనలను కేవలం ఒక బృందం చేసిన తప్పుగా మాత్రమే చూడటం సరిపోదు. విదేశాల్లో భారతీయుల ప్రవర్తనను గమనించే సందర్భాలు ఎక్కువగా ఉంటాయి. కొద్దిమంది చేసే పనులు మొత్తం దేశ ప్రజలపై సాధారణ అభిప్రాయాలు ఏర్పడటానికి కారణమవుతాయి. అందుకే ప్రయాణ సమయంలో వ్యక్తిగత స్వేచ్ఛతో పాటు సామాజిక బాధ్యతను కూడా గుర్తుంచుకోవాలి. మన ఇంట్లో లేదా పిక్నిక్ ప్రదేశంలో మనకు అనుకూలంగా అనిపించే పనులు, అంతర్జాతీయ విమానాశ్రయం వంటి క్రమబద్ధమైన ప్రదేశాల్లో సముచితంగా ఉండకపోవచ్చు.

దేశం మారినంత మాత్రాన మన ప్రవర్తన మారకపోతే ప్రయాణాల వల్ల కలిగే ప్రయోజనం ఏమిటి? విదేశాల్లో భారతీయ సంస్కృతి గొప్పతనాన్ని చెప్పుకోవడం ఎంత ముఖ్యమో, మన ప్రవర్తనతో దానిని ప్రతిబింబించడం కూడా అంతే అవసరం. పాస్‌పోర్టుతో దేశాలు దాటవచ్చు.. కానీ మంచి పౌరస్పృహ మాత్రం మన ప్రవర్తనలో కనిపించాలి.