తండ్రిపై ప్రేమ‌.. శ‌వాన్ని నాలుగేళ్లుగా.. !

తల్లిదండ్రుల‌పై ప్రేమ ఉండాల్సిందే. కానీ, అది వారు జీవించినంత వ‌ర‌కు ఉండాల్సిందే. కానీ, జ్యాత‌స్య‌హి ధ్రువో మృత్యు.. అన్న‌ట్టుగా కాలం తీరాక‌.. వారికి చేయాల్సిన క‌ర్మ‌లు చేసి.. రుణం తీర్చుకునే ప్ర‌య‌త్నం చేయ‌క త‌ప్ప‌దు. కానీ, ముంబైకి చెందిన ఓ మ‌హిళ త‌న తండ్రిపై ఉన్న ప్రేమ‌తో ఆయ‌న మ‌ర‌ణించిన త‌ర్వాత కూడా మృత‌దేహాన్ని అలానే భ‌ద్ర ప‌రుచుకుని ఉంచేసింది. 2022లో చ‌నిపోయిన పెద్దాయన మృత దేహాన్ని ఫ్రీజ‌ర్‌బా క్సులో ఉంచిన ఘ‌ట‌న తాజాగా వెలుగు చూసింది.

ముంబై వెస్ట్ నియోజ‌క‌వ‌ర్గం ప‌రిధిలోని ఓ ఇంటి నుంచి నాలుగు రోజులుగా తీవ్ర దుర్వాస‌న‌లు వెలువ‌డుతున్నా యి. దీంతో చుట్టుప‌క్క‌ల వారు పోలీసుల‌కు స‌మాచారం ఇచ్చారు. అక్క‌డ‌కు చేరుకున్న పోలీసుల‌కు.. ఇంటి ముందు “డేకేర్ సెంట‌ర్‌ త్వ‌ర‌లో ప్రారంభం` అని రాసి ఉంది. దీంతో అవాక్క‌య్యారు. అనంత‌రం.. తాళం ప‌గ‌ల‌గొట్టి లోప‌లికి ప్ర‌వేశించి చూడ‌గా.. ఫ్రీజ‌ర్ బాక్సులో ఉన్న పెద్దాయన మృత దేహం క‌నిపించింది. దీంతో వివ‌రాలు సేక‌రించి.. ఆయ‌న కుమార్తును రప్పించారు.

నాకు మానాన్న అంటే ప్రాణం.. అందుకే ఆయ‌న మ‌రణించ‌లేద‌ని భావిస్తున్నా.. ఆ దేహం నాతోనే ఉండాలి అని ఆమె జ‌వాబు ఇచ్చింది. అమెరికాలో మృత దేహాల‌ను ఏళ్ల త‌ర‌బ‌డి నిల్వ చేసే సంస్థ‌ను సంప్ర‌దించి.. వారు చెప్పిన‌ట్టే పాటిస్తున్నానని ఆమె తెలిపారు. త్వ‌ర‌లోనే మృత దేహాన్ని అమెరికాకు పంపించే ఏర్పాట్లు కూడా చేస్తున్న‌ట్టు వివ‌రించారు. కానీ, చుట్టుప‌క్క‌ల వారి ఫిర్యాదు మేర‌కు మృత‌దేహాన్ని సంప్ర‌దాయ రీతిలో అంత్య‌క్రియ‌లు నిర్వ‌హించాల‌ని పోలీసులు కోరారు. దీనికి ఆమె స‌సేమిరా అన‌డంతోకేసు న‌మోదు చేసి.. మృత‌దేహాన్ని మార్చురీకి త‌ర‌లించారు.

కొత్త కాదు..

మ‌న దేశంలో ఇలాంటి ఘ‌ట‌న‌లు త‌ర‌చుగా వెలుగు చూస్తున్నాయి. అయితే.. ఇన్ని సంవ‌త్స‌రాలు కాదు కానీ.. రోజుల త‌ర‌బ‌డి త‌మ వారి మృత‌దేహాల‌ను ఇళ్ల‌లోనే ఉంచుకుంటున్న‌ట్ట ఘ‌ట‌న‌లు ఉన్నాయి. తూర్పుగోదావ‌రి జిల్లాలో త‌ల్లి మృత దేహాన్ని 22 రోజుల పాటు కుమార్తెలు ఇంట్లోనే ఉంచుకున్నారు. ప‌లు ర‌సాయ‌నాలు పూసి దానిని కాపాడుకున్నారు. కానీ, చివ‌ర‌కు వెలుగు చూడ‌డంతో పోలీసులు అంత్య‌క్రియ‌లు చేశారు. గుంటూరు, నెల్లూరు, వ‌రంగ‌ల్, చెన్నైల‌లోనూ ఇలాంటి ఘ‌ట‌న‌లు వెలుగు చూశాయి.

కోర్టు తీర్పులు..

మృత దేహాల‌ను నిల్వ చేసుకునే విష‌యంపై కోర్టు తీర్పులు కూడా ఉన్నాయి. గ‌రిష్ఠంగా 10 నుంచి 20 రోజుల వ‌ర‌కు వ్య‌క్తిగ‌త కార‌ణాల‌తో మృత దేహాల‌ను నిల్వ చేసుకునే అవ‌కాశం ఉంది. అయితే.. వీటిని ప్ర‌భుత్వ మార్చురీల్లోనే ఉంచాలి. వైద్య ప‌ర‌మైన‌, అనుమానాస్ప‌ద ఘ‌ట‌న‌ల విష‌యంలో ఈ ప‌రిమితి లేదు. ఇలా.. కొన్ని నెల‌లు భ‌ద్ర ప‌రిచే అవ‌కాశం ఉంది.