ట్రంప్ తిప్పలు… వీడియో కాల్ లో నిశ్చితార్థం

అమెరికా అధ్యక్షుడి హోదాలో డొనాల్డ్ ట్రంప్ తీసుకుంటున్న విచిత్రమైన నిర్ణయాలతో ఆ దేశ ప్రజలతో పాటు ఆ దేశంలోని విదేశీయులు నానా ఇబ్బందులు పడుతున్నారు. అమెరికాలో ఓ రేంజిలో సత్తా చాటుతున్న భారతీయులు… అందులోనూ తెలుగు వారి తిప్పలు వర్ణనాతీతమనే చెప్పాలి. ట్రంప్ అధ్యక్షుడు అయ్యాక అమెరికాలో వీసా నిబంధనలు కఠినతరం కాగా… తమ మాతృభూమిలో వివాహం చేసుకోవాలని భావించిన తెలుగు జంట వీడియో కాల్ లోనే నిశ్చితార్థం చేసుకోవాల్సిన దుస్థితి వచ్చింది. ఆగస్టులో జరగనున్న వీరి వివాహం కూడా అక్కడే జరగనుండగా… ఆ పెళ్లి వేడుకకు అయినా వారి తల్లిదండ్రులు, బంధుమిత్రులు హాజరవుతారో, లేదో చూడాలి.

ఈ ఘటన వివరాల్లోకి వెళితే… ఏపీలోని రాయలసీమ ముఖ ద్వారా కర్నూలు నగరానికి చెందిన ఓ యువకుడు, అతడు, అతడితో వివాహం నిశ్చయమైన యువతి అమెరికాలోనే ఉన్నారు. వివాహం ఖరారైన నేపథ్యంలో కర్నూలు వచ్చి ఘనంగా నిశ్చితార్థంతో పాటుగా వివాహ వేడుకను అంగరంగవైభవంగా చేసుకోవాలని ఆ జంట భావించింది. అయితే ట్రంప్ పుణ్యమా అని అమెరికాలో వీసా నిబంధనలు కఠినం కాగా… వారిద్దరూ భారత్ రావడానికి వీలు కాలేదు. అదే సమయంలో వారి తల్లిదండ్రులు అక్కడికి చేరడానికి కుదర్లేదు. దీంతో వీడియో కాల్ నిశ్చితార్ధం చేసుకోవడం మినహా వారికి వేరే మార్గం కనిపించలేదు.

అనుకున్నదే తడవుగా ముందుగా నిర్దేశించుకున్న ముహూర్తానికే ఆ జంట నిశ్చితార్థం చేసుకోవాలని నిర్ణయించుకుంది. అమెరికాలోని మిస్ కాన్సిన్ స్టేట్ లో ఉంటున్న ఆ జంట అక్కడే నిశ్చితార్థ వేడుకను నిర్వహించుకుంది. ఈ కార్యక్రమాన్ని వారు వీడియో కాల్ ద్వారా తమ తల్లిదండ్రులకు చూపించారు. ఈ వేడుకను బంధుమిత్రులతో కలిసి వీక్షించేందుకు ఆ జంట కుటుంబం కర్నూలులోని ఓ ప్రైవేట్ హోటల్ లో బారీ ఏర్పాట్లు చేసింది. బంధుమిత్రులంతా ఈ వేడుకలను ప్రత్యక్షంగా తిలకించేందుకు హోటల్ లో భారీ స్ర్రీన్లను ఏర్పాటు చేసింది. అంతేకాకుండా కర్నూలు నుంచే ఆ జంట నిశ్చితార్ధ వేడుకకు వేదమంత్రాలను చదివేలా పండితులను ఏర్పాటు చేసింది.

కర్నూలులో వేదపండితుల మంత్రోచ్ఛారణలు పలుకగా… మిస్ కాన్సిన్ స్టేట్ లో ఆ జంట ఉంగరాలు మార్చుకుంది. పూల దండలూ మార్చుకుంది. ఆన్ లైన్ లో అయినా ఈ వేడుక ఘనంగానే జరిగింది. నిశ్చితార్థాన్ని ఇలా ఆన్ లైన్ లో చేసుకున్న ఈ జంట ఆగస్టు 30న అమెరికా వాణిజ్య రాజధాని న్యూయార్క్ లో పెళ్లి చేసుకోవాలని నిర్ణయించుకుంది. మరి ఈ వేడుకకు అయినా ఆ జంట తల్లిదండ్రులు, బంధుమిత్రుల మధ్య జరుపుకుంటుందో…లేదంటే నిశ్చితార్థం మాదిరే వీడియో కాల్ నే ఆశ్రయించాల్సి వస్తుందో చూడాలి.