రేవంత్ రెడ్డికి ప్రమోషన్

ఆల్రెడీ తెలంగాణ పీసీసీ అధ్యక్షుడిగా పార్టీలో అత్యున్నత పదవిలోనే ఉన్నాడు కదా.. కొత్తగా రేవంత్ రెడ్డికి ఏం ప్రమోషన్ వచ్చింది అని ఆశ్చర్యం కలుగుతోందా? ఐతే ఈ ప్రమోషన్ రేవంత్ రెడ్డి రాజకీయ ప్రయాణానికి సంబంధించింది కాదు. ఆయన వ్యక్తిగత జీవితంతో ముడిపడ్డది. చూడ్డానికి ఇంకా పెద్ద వయసేమీ కానట్లు కనిపించే రేవంత్.. అప్పుడు తాత అయిపోయాడు.

కొన్నేళ్ల కిందటే పెళ్లి చేసుకున్న రేవంత్ ముద్దుల కూతురు నైమిష.. తాజాగా బిడ్డను ప్రసవించింది. తాను తాత అయిన విషయాన్ని ట్విట్టర్ ద్వారా రేవంత్ స్వయంగా వెల్లడించాడు. నైమిషకు మగ బిడ్డ పుట్టాడు. ఆ బిడ్డను లాలిస్తున్న ఫొటోను రేవంత్ సోషల్ మీడియాలో ఫాలోవర్లతో పంచుకున్నాడు. “మా కుటుంబంలోకి మనవడు వచ్చాడని చెప్పడానికి ఎంతో సంతోషిస్తున్నాను. నా చిన్నారి నైమిష.. గత వారం మగ బిడ్డను ప్రసవించింది. తల్లీ బిడ్డలకు మీ అందరి ఆశీస్సులు కావాలి” అని రేవంత్ పేర్కొన్నాడు.

రేవంత్ 2016లో తెలుగుదేశం పార్టీలో ఉన్న సమయంలో నైమిషకు పెళ్లయింది. కూతురి పెళ్లి సమయంలో రేవంత్ రాజకీయంగా కాస్త ఒడుదొడుకులు ఎదుర్కొన్నాడు. ఓటుకు నోటు కేసు అప్పుడే వెలుగులోకి వచ్చింది. ఆ తర్వాత కొన్నేళ్లకు ఆయన కాంగ్రెస్ పార్టీ తీర్థం పుచ్చుకున్నారు. ప్రస్తుతం తెలంగాణ పీసీసీ అధ్యక్షుడిగా బాధ్యతలు నిర్వర్తిస్తున్నాడు.