స్టాలిన్ జపంలో మెగా ఫ్యామిలీ..!

తమిళనాడు ముఖ్యమంత్రి స్టాలిన్ పై మెగా ఫ్యామిలీ ప్రశంసల వర్షం కురిపిస్తోంది. మొన్నటికి మొన్న చిరంజీవి.. స్టాలిన్ ని ప్రత్యేకంగా కలవగా.. తాజాగా పవన్ కళ్యాణ్ ప్రశంసల వర్షం కురిపించారు.

బుధవారం చెన్నై వెళ్లిన చిరు.. సీఎం స్టాలిన్‌ను ఆయన ఆఫీస్‌లో కలిశారు. ఆయనతోపాటు స్టాలిన్ తనయుడు ఉదయనిధి స్టాలిన్ కూడా ఉన్నారు. చిరంజీవి కుటుంబానికి స్టాలిన్ ఫ్యామిలీకి మొదటి నుంచి మంచి సన్నిహిత సంబంధాలు ఉన్నాయన్న విషయం తెలిసిందే.

అంతకుముందు స్టాలిన్ పాలన‌పై పవర్ స్టార్ పవన్ కళ్యాణ్ ప్రశంసలు కురిపించారు. స్టాలిన్ పాలన దేశంలోని అన్ని రాష్ట్రాలకూ ఆదర్శమంటూ పొగడ్తలతో ముంచెత్తారు జనసేనాని. మాటలే కాదు.. చేతల్లోనూ పాలన ఎలా ఉండాలో స్టాలిన్ చూపిస్తున్నారని పవన్ మెచ్చుకున్నారు. ఈ మేరకు ఆయన చేసిన ట్వీట్ వైరల్ అవుతోంది.

“ఏ పార్టీ అయినా అధికారంలోకి వచ్చేందుకు రాజకీయాలు చేయాలే తప్ప.. అధికారంలోకి వచ్చాక చేయకూడదు. ఆ విషయాన్ని మీరు మాటల్లోనే కాకుండా చేతల్లోనూ చేసి చూపిస్తున్నారు. మీ పాలన, పనితీరు తమిళనాడు ఒక్క దానికే కాదు.. దేశంలోని మిగతా రాష్ట్రాలకూ, రాజకీయ పార్టీలకూ ఆదర్శం, మార్గదర్శి. అంత మంచి పాలన అందిస్తున్న మీకు మనస్ఫూర్తిగా అభినందనలు” అంటూ స్టాలిన్ ను ప్రశంసించారు.

కాగా, ఇటీవల జరిగిన అసెంబ్లీ ఎన్నికల్లో ఎం.కె. స్టాలిన్ ఆధ్వర్యంలోని డీఎంకే పార్టీ ఘన విజయం సాధించిన సంగతి తెలిసిందే. కాంగ్రెస్, ఇతర పార్టీలతో కలిసి సెక్యులర్ ప్రోగ్రెసివ్ అలయన్స్ (ఎస్పీఏ)గా ఏర్పడిన ఆ పార్టీ.. 159 సీట్లను గెలుచుకుంది. ఒక్క డీఎంకేనే 133 స్థానాల్లో విజయం సాధించింది. స్టాలిన్ ను సీఎంగా ఏకగ్రీవంగా ఎన్నుకున్నారు.