షర్మిల భేటీలో అడుగుతున్న ఆ 11 ప్రశ్నలేమిటి?

పార్టీ పెట్టాలన్న ఆలోచన కష్టం కాదు కానీ.. పార్టీని పక్కా ప్లాన్ తో పెట్టటం అంత తేలికైన విషయం కాదు. ఈ కారణంతోనే చాలామంది పార్టీలు పెడతారు కానీ.. దాని ప్రభావం ప్రజల్లో పెద్దగా కనిపించదు. తెలుగు రాష్ట్రాల్లో తెలుగుదేశం పార్టీ తర్వాత చాలామంది చాలా పార్టీలే పెట్టారు. కానీ.. ఇప్పటివరకు అధికారంలోకి వచ్చినవి రెండు పార్టీలే. అందులో ఒకటి టీఆర్ఎస్.. రెండోది వైఎస్సార్ కాంగ్రెస్. మిగిలిన పార్టీల్లో కొన్నింటికి ప్రజాదరణ ఉన్నప్పటికీ.. చేతికి పవర్ మాత్రం రాని దుస్థితి. ఎందుకిలా అంటే.. పార్టీ పెట్టటం ఈజీనే. కానీ.. ప్రజల నమ్మకాన్ని దోచుకోవటం.. వారి మనసుల్లో అధికారం తమకు ఇవ్వాలన్న భావనను బలంగా కలిగించేలా చేయటం మామూలు విషయం కాదు.

ఇదిలా ఉంటే.. తాజాగా తెలంగాణలో రాజన్న కుమార్తె షర్మిల కొత్త పార్టీ పెట్టాలని డిసైడ్ కావటం.. అందుకు పక్కా ప్లానింగ్ తో ముందుకు వెళ్లటం తెలిసిందే. శనివారం హైదరాబాద్ లోని లోటస్ పాండ్ లో హైదరాబాద్.. ఉమ్మడి రంగారెడ్డి జిల్లాలకు చెందిన వైఎస్ అభిమానులతో ఆత్మీయ సమ్మేళనాన్ని నిర్వహించారు. ఈ సందర్భంగా కొత్త ఎత్తుగడను తెర మీదకు తీసుకొచ్చింది షర్మిల టీం.

తనతో భేటీకి వచ్చిన వారందరికి.. 11 ప్రశ్నలతో కూడిన క్వశ్చనీర్ చేతిలో పెట్టారు. అందులో వివరాలు వెల్లడించాలని పేర్కొన్నారు. అంతేకాదు.. ప్రశ్నావళిని పూర్తి చేసే ప్రతి ఒక్కరు ఫోన్ నెంబరుతో పాటు.. వారి సోషల్ మీడియా ఖాతాల వివరాలతో పాటు వాట్సాప్ ఫోన్ నెంబరును నమోదు చేయలని కోరటం గమానార్హం.

ఇంతకూ షర్మిల టీం ఇస్తున్న ప్రశ్నావళిలో ఏముంది? అన్న విషయంలోకి వెళితే..

1 తెలంగాణలో వైఎ్‌సఆర్‌ అభిమానులు ఎదుర్కొంటున్న కష్టాలేమిటి? వాటిని ఏ విధంగా పరిష్కరించుకోవాలి?

2. మీ అసెంబ్లీ నియోజకవర్గంలో వైఎస్ చేసిన పనులేంటి?
3. మన రాజకీయ నిర్ణయం గురించి ప్రజలు ఏమనుకుంటున్నారు?
4. ప్రస్తుతం రాష్ట్రంలో కేసీఆర్‌ను, టీఆర్‌ఎస్ ను ఎలా ఎదుర్కోవాలి? దానికి మీరిచ్చే సలహా ఏమిటి?
5. రాష్ట్రంలో ఉన్న బీజేపీని మనం ఏ విధంగా ఎదుర్కోవాలి? దానికి మీరిచ్చే సలహాలు ఏంటి?
6. తెలంగాణ సమాజం/ఉద్యమకారుల నుంచి ఎదురయ్యే ప్రశ్నలేంటి? వాటికి ఎలాంటి సమాధానం చెప్పాలి?
7. రాష్ట్రంలో బలమైన ప్రత్యామ్నాయంగా ఏర్పడాలంటే రాష్ట్ర, జిల్లా స్థాయిల్లో పోరాడాల్సిన అంశాలు ఏంటి?
8. సంస్థాగతంగా బలపడేందుకు, క్యాడర్‌ను నిర్మించుకోవడానికి చేయాల్సిన పనులు ఏంటి?
9. సంక్షేమ పాలన మళ్లీ తీసుకురావాలంటే మీరిచ్చే సలహాలేంటి?
10. వైఎస్సార్ సంక్షేమ పాలన మళ్లీ తీసుకురావాలంటే మీరిచ్చే సలహాలు ఏమిటి?
11. తెలంగాణలో బలమైన ప్రత్యామ్నాయంగా ఏర్పడాలంటే నియోజకవర్గ స్థాయిలో ఏం చేయాల్సి ఉంటుంది?